कोरोना संक्रमणमुक्त भएपछि एमाले नेता झलनाथ खनाल डिस्चार्ज हुँदै

काठमाडाैं-कोरोना संक्रमण भएर नर्भिक इन्टरनेशनल हस्पिटलमा उपचाररत पूर्व प्रधानमन्त्री तथा नेकपा एमालेका नेता झलनाथ खनाल आज डिस्चार्ज हुँदैछन् । अस्पतालकाअनुसार स्वस्थ भएपछि चिकित्सकको सल्लाहअनुसार खनाल मंगलबार डिस्चार्ज हुन लागेका हुन् ।

१८ बैशाखमा कोभिड १९ पोजेटिभ देखिएपछि खनाल नर्भिक अस्पतालमा भर्ना भएका थिए । उनलाई अक्सिजनको सपोर्टमा उपचार सुरु गरिएको थियो । नर्भिक अस्पतालमा भर्ना भएको भोलिपल्टदेखि नै उनको प्लाज्मा थेरापी विधिबाट समेत उपचार गरिएको थियो ।

स्वास्थ्य सुधार भएपछि २ दिनअघि स्वाब परीक्षण गर्दा उनको कोरोना रिपोर्ट नेगेटिभ आएको थियो ।

खनालको उपचारमा नर्भिक अस्पतालका चिकित्सकहरु डा. जेपी जैसवाल र डा. बी श्रीवास्तव नेतृत्वको स्वास्थ्यकर्मीको टिम संलग्न थियो ।