जोनसोन एण्ड जोनसोनको खोप आजदेखि काठमाडौंमा सबैले लगाउन पाउने

काठमाडौं—अमेरिकी कम्पनी जोनसोन एण्ड जोनसोनको खोप आजदेखि काठमाडौंमा सबैले लगाउन पाउने भएका छन् । सरकारले १८ वर्षमाथिका सबैलाई आजदेखि काठमाडौं जिल्लामा जोनसोन एण्ड जोनसोनको खोप दिन सुरु गरेको हो ।

स्वास्थ्य कार्यलय काठमाडौंका प्रमुख बद्रीबहादुर खड्काअनुसार काठमाडौंलाई दिइएको १ लाख डोज खोप बाँकी रहेकाले सो खोप १८ वर्षमाथिका सबै नागरिकलाई पुगेसम्म लगाउने बताए ।

‘हामीसँग १ लाख डोज जोनसोन एण्ड जोनसोनको खोप बाँकी छ,’ उनले भने, ‘त्यसले पुगुन्जेलसम्म हामी काठमाडौं जिल्लामा १८ वर्षमाथिका सबैलाई लगाइदिन्छौं ।’

अमेरिकी सरकारले नेपाललाई एक डोज लगाउँदा पुग्ने १५ लाखभन्दा बढी डोज जोनसोन एण्ड जोनसोनको खोप सहयोग गरेको थियो । सो खोप शुक्रबारबाट ५० वर्षमाथिका, विदेश जानुपर्ने, अपांगलगायतका दिदैं आएको थियो ।