यो साता संक्रमणदरमा १४.३ प्रतिशतले कमी : प्रवक्ता डा. मिश्रा

काठमाडौँ – एक सातामा संक्रमणदरमा १४.३ प्रतिशतले कमी आएको छ। स्वास्थ्य मन्त्रालयको बुधबारको पत्रकार सम्मेलनमा प्रवक्ता डा. संगीता कौशल मिश्राले यो साताको संक्रमणदर ३५.२ प्रतिशत रहेको र संक्रमणदरमा १४.३ प्रतिशतले कमी आएको जानकारी दिइन।

उनका अनुसार अघिल्लो साताको तुलनामा यो साता संक्रमणदर निकै घटेको छ। ‘अघिल्लो हप्तामा परीक्षणमा संक्रमण पुष्टि हुने दर ४९.५ प्रतिशत थियो । यो साता ८४ हजार २३१ परीक्षण गर्दा २९ हजार ६९० को पोजेटिभ रिपोर्ट आएको छ, ‘उनले भनिन्।

यस्तै, डा. मिश्राले राष्ट्रिय जनस्वास्थ्य प्रयोगशालामा २४ वटा नमुनाको जीन सिक्वेन्सिङ गर्दा २१ वटामा ओमिक्रोन र ३ वटामा डेल्टा भेरियन्ट पुष्टि भएको बताइन । उक्त  जीन सिक्वेन्सिङको रिपोर्टले ओमिक्रोन भेरियन्ट नेपालको हरेक प्रदेशमा रहेको पुष्टि हुने उनको भनाइ छ।