कलेजो प्रत्यारोपणमा शिक्षण अस्पताललाई तेस्रो सफलता

काठमाडौं-त्रिवि शिक्षण अस्पताल महाराजगन्जले तेस्रो पटक कलेजो प्रत्यारोपण सफलतापूर्वक सम्पन्न गरेको छ । शुक्रबार अस्पतालका कन्सल्ट्यान्ट सर्जन डा. रमेशसिंह भण्डारी नेतृत्वको टोलीले तेस्रो पटक सफलतापूर्वक कलेजो प्रत्यारोपण गरेको हो ।

रुपन्देहीका एक ५० वर्षीय बिरामीमा कलेजो प्रत्यारोपण गरिएको थियो । उनलाई उनका २७ वर्षीया छोराले कलेजो दिएका हुन् ।

भारतको नयाँदिल्लीस्थित फोर्टिक्स अस्पतालका चिकित्सकहरुको सहयोगमा उक्त कलेजो प्रत्यारोपण गरिएको थियो । यसअघि शिक्षण अस्पतालमा गत १८ जेठ र ३ साउनमा गरी दुई पटक कलेजो प्रत्यारोपण गरिसकेको छ ।

तेस्रो प्रत्यारोपण डा. भण्डारीले नेपालमा स्थायी कलेजो प्रत्यारोपण कार्यक्रमका लागि आशाको किरण देखिएको प्रतिक्रिया दिएका छन् ।