सुर्खेत प्रादेशिक अस्पतालमा दोस्रो मिर्गौला प्रत्यारोपण

वीरेन्द्रनगर—सुर्खेतस्थित सुर्खेत प्रादेशिक अस्पतालमा दोस्रो मिर्गौला प्रत्यारोपण सफलतापूर्वक सम्पन्न भएको छ । बिहीबार अस्पतालले शहीद धर्मभक्त राष्ट्रिय प्रत्यारोपण केन्द्रसँगको सहकार्यमा दोस्रो मिर्गौला प्रत्यारोपण गरेको हो ।

रोल्पा जिल्लाको रोल्पा नगरपालिका—२ का ३७ वर्षीय युवाको मिर्गौला प्रत्यारोपण गरिएको हो । उनलाई उनकी ५५ वर्षीया आमाले मिर्गौला दान गरेकी थिइन् ।

अस्पतालकाअनुसार अहिले अंगदाता र अंग ग्रहणकर्ता दुवैको स्वास्थ्य अवस्था सामान्य रहेको छ । प्रत्यारोणमा केन्द्रका कार्यकारी निर्देशक डा. पुकारचन्द्र श्रेष्ठ र सुर्खेत प्रादेशिक अस्पतालका निर्देशक डा. डम्बर खड्काको टिम संलग्न रहेको थियो ।

सुर्खेत प्रादेशिक अस्पतालमा पहिलो पटक २१ माघ २०७९ मा मिर्गौला प्रत्यारोपण गरिएको थियो ।