शंकास्पद २ विरामीको रिपोर्टमा कोरोना भाइरस नभएको पुष्टि

काठमाडौं – शुक्रराज ट्रपिकल तथा सरुवा रोग अस्पतालमा परिक्षण गराएका शंकास्पद दुई विरामीको रिपोर्टमा कोरोना भाइरस नेगेटिभ देखिएको छ । सोमबार राष्ट्रिय जन स्वास्थ्य प्रयोगशालामा गरिएको जाँचमा उनीहरुको रिपोर्ट नेगेटिभ आएको स्वास्थ्य मन्त्रालयका प्रवक्ता महेन्द्र प्रसाद श्रेष्ठले बताए ।

रिपोर्ट सकरात्मक आएका कारण चाँडै डिस्चार्ज गर्ने तयारी रहेको समेत् उनले जानकारी दिए। बाँकी एक महिलाको नमुना परिक्षण भने मंगलबार हुनेछ। अहिलेसम्म एक नेपालीमा मात्रै कोरोना भाइरस पुष्टि भएको छ । चीनको वुहान प्रान्तबाट नेपाल फर्किएका एक नेपाली विद्यार्थीमा कोराना भाइरस भएको पुष्टि भएको थियो। उनको रिपोर्ट जाँचको लागि भने हङकङ पठाइएको थियो। हेल्थआवाजसँग कुरा गर्दै प्रवक्ता श्रेष्ठले भाइरस सङ्क्रमित उक्त विद्यार्थीको बाहेक कुनै पनि रिपोर्ट परिक्षणका लागि विदेश नपठाइएको बताए।

चीनबाट फैलिएको कोराना भाइरसले विश्वलाई त्रसित बनाएको छ। हालसम्मको तथ्याङ्क अनुसार कोरानाबाट मृत्यु हुनेको संख्या ८० पुगेको छ भने करिब २३ हजार जना प्रभावित छन्।