भरतपुर अस्पतालको कोभिड वार्ड अव्यवस्थित

काठमाडौँ – चितवनको भरतपुरस्थित भरतपुर अस्पतालको कोभिड वार्डको आईसियू अव्यवस्थित अवस्थामा रहेको पाइएको छ । उक्त वार्डको आईसियु, शौचालय लगायतका ठाउँ व्यवस्थापनमा चरम लापरवाही देखिन्छ।

कोभिड-१९ बिरामीको उपचार हुने वार्ड सफा र व्यवस्थित हुनुपर्नेमा झन फोहोर र दुर्गन्धित छ । अस्पतालमा कोभिडको उपचार गर्ने बिरामी र बिरामीका कुरुवाहरुले अस्पतालको उक्त लापरवाही बारे सामाजिक संजालमै असन्तुष्टि पोखिरहेका छन्।

अस्पतालका सुपरिटेन्डेन्ट डा. जगनाथ तिवारीले आफूहरुले दिनमा ३ पटकसम्म कोभिड वार्ड सफा गरिरहेको बताए। ‘हामीले दिनमा ३ पटकसम्म कोभिड वार्ड सफा गरिरहेका छौँ,’उनले भने, ‘भित्र फोहोर छैन बाहिर अक्सिजन सिलिन्डर ओसार-पोसार गर्ने क्रममा केही फोहोर देखिएको हो । त्यसलाई पनि मैले तत्काल सफा गरिरहन निर्देशन दिइसकेको छु ।’

डाक्टर तिवारीले कोभिड वार्डका शौचालयहरुलाई पनि आफूले सफा राख्न निर्देशन दिइसकेको बताए ।