बेलायतमा भेपको प्रयोग बढ्दा घट्यो चुरोट सेवन

बेलायतमा चुरोट सेवन गर्नेको सङ्ख्यामा कमी आएको छ । गत वर्षको भन्दा निकै तल झरेको उक्त रेकर्डमा चुरोट सेवन गर्नेको सङ्ख्या घटे पनि इ–चुरोट अर्थात् भेप को सेवन गर्नेको सङ्ख्या बढेको एक अध्ययनले जनाएको छ  ।

अफिस फर स्ट्याटिस्टिक्स बेलायतको तथ्याङ्क अनुसार सन् २०२० मा १४ प्रतिशत रहेको उक्त सङ्ख्या २०२१ मा १३.३ प्रतिशतमा झरेको हो ।  त्यो सङ्ख्यामा पनि १६ वर्षभन्दा माथिका ७.७ प्रतिशतले इ–चुरोट अर्थात् भेप प्रयोग गरेको जनाएका छन् ।

उक्त सङ्ख्या २०२० मा जम्मा ६.४ प्रतिशत थियो ।सन् २०११ मा गरिएको सर्वेक्षणमा चुरोट सेवन गर्नेको सङ्ख्या २०.२ प्रतिशत रहेको थियो । डाटा एन्ड एनालाइसिस फर सोसल केयर एन्ड हेल्थ डिभिजन, बेलायतका अधिकारी जेम्स टकरले चुरोट सेवन गर्नेको सङ्ख्या घट्नुमा भेप को ठुलो भूमिका रहेको बताएका छन् ।

उनले यो तथ्याङ्क घट्नुमा भेप को बढ्दो प्रयोग बताउँदै बढ्दो विभिन्न जनचेतनाको कार्यक्रमहरूले पनि यसलाई असर गरेको बताएका छन् । सरकारले यस सङ्ख्यालाई घटाउँदै २०२२ को अन्तिमसम्ममा १२ प्रतिशत योजना राखेको पनि उक्त तथ्याङ्कले जनाएको छ ।

एजेन्सीको सहयोगमा