काठमाडौं—फ्रन्टलाइन अस्पतालले महिलाको स्वास्थ्य, सचेतना तथा जीवनका विभिन्न चरणमा देखिने स्वास्थ्य सम्बन्धी समस्याबारे जानकारी प्रदान गर्ने उद्देश्यले ‘द जर्नी अफ वुमेन्स’ कार्यक्रम सम्पन्न गरेको छ । अस्पतालले १४ असोजमा होटल बाराहीमा उक्त कार्यक्रम सम्पन्न गरेको हो ।
महिलाको स्वास्थ्यसँग सम्बन्धित विभिन्न विषयमा विशेषज्ञ चिकित्सकहरूबाट जानकारी तथा अनुभव आदान—प्रदान गर्ने उद्देश्यले आयोजित उक्त कार्यक्रममा स्त्रीरोग, पेल्भिक फ्लोर स्वास्थ्य, पिसाब सम्बन्धी समस्या तथा रजोनिवृत्तिका विषयमा विस्तृत छलफल गरिएको थियो ।
कार्यक्रमको उद्घाटन तथा स्वागत मन्तव्य राख्दैं फ्रन्टलाइन अस्पतालका प्रमुख कार्यकारी अधिकृत (सीईओ) डा. अशोकवर्धनले उपस्थित सम्पूर्ण अतिथि, वक्ता तथा सहभागीहरूलाई स्वागत गरेका थिए । उनले अस्पतालले महिला स्वास्थ्यलगायत विभिन्न समूह लक्षित स्वास्थ्य सचेतनामूलक कार्यक्रमहरू सञ्चालन गर्दै आएको जानकारी दिए ।
युवाहरूलाई लक्षित गरी स्वास्थ्यसम्बन्धी छलफल गर्ने क्रममा मानसिक स्वास्थ्यको आवश्यकता र महत्व महसुस भएको उल्लेख गर्दै डा. अशोकवर्धन महिलाको स्वास्थ्यलाई पनि विशेष प्राथमिकतामा राखेर ‘द जर्नी अफ वुमेन्स’ कार्यक्रम आयोजना गर्ने सोच विकास भएको जानकारी दिए । ‘महिलाको स्वास्थ्य सम्बन्धी विविध विषयमा खुला छलफल, विशेषज्ञ परामर्श तथा सचेतना अभिवृद्धि गर्ने उद्देश्यले सुरु गरिएको यो कार्यक्रमलाई आगामी दिनमा पनि फरक–फरक विषयवस्तुसहित निरन्तरता दिने अस्पतालको योजना छ,’ उनले भने ।
कार्यक्रमको सञ्चालन डा. सृष्टि धुतराजले गरेकी थिइन् । उनले विशेषज्ञ चिकित्सकहरूका प्रस्तुति तथा अन्तरक्रियात्मक सत्रहरूलाई सहजीकरण गरेकी थिइन् । कार्यक्रममा चार जना विशेषज्ञ चिकित्सकहरूले महिलाको स्वास्थ्यसँग सम्बन्धित महत्वपूर्ण विषयमा प्रस्तुति दिएका थिए ।
डा. निरा सिंह श्रेष्ठले कस्मेटिक गाइनोकोलोजी तथा पेल्भिक फ्लोर सम्बन्धी विषयमा आफ्नो विशेषज्ञता, अनुभव तथा महत्वपूर्ण जानकारी प्रस्तुत गरेकी थिइन् । उनको प्रस्तुतिले महिलाको प्रजनन तथा पेल्भिक फ्लोर स्वास्थ्य सम्बन्धी विषयमा सहभागीहरूलाई थप जानकारी प्रदान गरेको थियो ।
त्यसैगरी, डा. उदिता मिश्रले ओभरएक्टिभ ब्लाडर अर्थात् अति सक्रिय मूत्राशय सम्बन्धी समस्याका कारण, लक्षण तथा व्यवस्थापनका विषयमा प्रस्तुती दिएकी थिइन् । उनले उक्त समस्याबारे सचेतना र समयमै स्वास्थ्य परामर्शको महत्वबारे प्रकाश पारेकी थिइन् ।
डा. अमिता राजेश्वरी थापाले पिसाब चुहिने समस्या तथा यसको उपचारात्मक हस्तक्षेप सम्बन्धी विषयमा प्रस्तुति दिँदै महिलामा देखिने पिसाब चुहिने समस्याको पहिचान, उपचारका विकल्प तथा व्यवस्थापनका विषयमा आफ्नो विशेषज्ञता साझा गरिन् ।
त्यस्तै, डा. उना पन्तले रजोनिवृत्ति सम्बन्धी विषयमा जानकारी दिँदै महिलाको जीवनमा रजोनिवृत्तिको चरणमा देखिने शारीरिक तथा स्वास्थ्यसम्बन्धी परिवर्तन, त्यसको व्यवस्थापन र यस अवधिमा आवश्यक स्वास्थ्य सचेतनाबारे आफ्नो अनुभव तथा ज्ञान प्रस्तुत गरिन् ।
कार्यक्रममा सहभागी महिलाहरूले विशेषज्ञ चिकित्सकहरूसँग महिलाको स्वास्थ्यसम्बन्धी विभिन्न विषयमा जानकारी लिने तथा आफ्ना जिज्ञासा राख्ने अवसर प्राप्त गरेका थिए । कार्यक्रमले महिलालाई आफ्नो स्वास्थ्यप्रति सचेत बनाउनुका साथै स्वास्थ्यसम्बन्धी विषयमा खुलेर छलफल गर्ने वातावरण निर्माण गर्न सहयोग पुग्ने विश्वास अस्पतालले लिएको छ।
महिलाको स्वास्थ्य, सचेतना र सशक्तीकरणलाई प्राथमिकतामा राख्दै फ्रन्टलाइन अस्पतालले ‘द जर्नी अफ वुमेन्स’ कार्यक्रमलाई आगामी दिनमा पनि विभिन्न स्वास्थ्य विषय वस्तुमा निरन्तरता दिने प्रतिबद्धता व्यक्त जनाएको छ ।
