२०७८ असोज ३०, शनिबार
Health Aawaj logo
गृहपृष्ठप्रोफाइलअहोरात्र सेवामा खटिइरहेका जनस्वास्थ्य निरिक्षक केशव

अहोरात्र सेवामा खटिइरहेका जनस्वास्थ्य निरिक्षक केशव

जसले १४ वर्ष बझाङका ग्रामीण वस्तीमा नागरिकको स्वास्थ्य सेवामा बिताए


बुटवल—सेवा गर्न पाउँदा निकै आनन्द मान्ने केशव भट्टराई पछिल्लो समय आफूलाई कोभिड–१९ संक्रमितको उपचार र सेवामा पूर्ण रुपमा समर्पित गरेका छन् । कपिलवस्तु जिल्लाको कपिलवस्तु नगरपालिका–९ मा जन्मिएका ४१ वर्षीय भट्टराई बुवाको प्रेरणाबाट सामाजिक सेवामा लागेका हुन् ।

‘मेरो बुवाको उत्प्रेरणाले नै म समाजिक सेवामा लागेको हुँ । समाजिक सेवा गर्दा आमाले पनि स्याबासी दिनुहुन्थ्यो,’ उनी सम्झन्छन्, ‘त्यसले मलाई झन उर्जा थप्ने गर्दथ्यो । मानवीय सेवामा खटिनु मेरो लागि निकै आन्दको विषय पनि हो ।’

सामाजिक सेवाअन्तर्गत मानिसको स्वास्थ्यसँग जोडिएर सेवामा रहेका भट्टराई कोभिड–१९ महामारीमा फ्रन्टलाइनमा छन् । स्वास्थ्यकर्मी हुनुलाई नै मानवीय सेवा गर्ने अवसर मान्ने भट्टराई खुला हृदयले सेवामा खटिएका देखिन्छन् । तिलोत्तमा नगरपालिकाको जनस्वास्थ्य निरिक्षकका (छैटौं तह) रुपमा कार्यरत उनी विहानदेखि रातिसम्मै कोभिड–१९ संक्रमितसँगै हुन्छन् । उनीहरुको हेरचाह, औषधीको व्यवस्थापनसँगै हौसला दिनमा तल्लीन रहन्छन् । उनीसँग कोभिड–१९ भाइरसबाट संक्रमित भएकाहरु समेत अंगालो बेरिन आउने गरेको अनुभव छ । ‘बिरामीहरु अत्तालिएका बेला अंकमाल गर्न आउँछन् । उनीहरुलाई सान्तवना दिन पछि पर्ने कुरा आउँदैन,’ उनी भन्छन्, ‘सानो हौसलाले पनि बिरामीको प्राण भर्ने गर्दछ ।’

भट्टराई तिलोत्तमा नगरपालिकाको कोभिड–१९ फोकल पर्सन हुन् । उनी नगरपालिकाले लिएको कोभिड–१९ नियन्त्रणको मेकानिजम कार्यन्वयनका लागि डटेर खटिने स्वास्थ्यकर्मी हुन् । जनप्रतिनिधि र स्वास्थ्य सरोकारवाला निकायसँग समन्वय गरेर काम गर्दा सकारात्मक नतिजा आएको उनको अनुभव छ ।

वि.सं. २०५६ सालमा बझाङ जिल्लाबाट (चौथो तह) सरकारी सेवा सुरु गरेका भट्टराईले जागिरको अवधीमा महत्वपूर्ण पुरस्कारहरु समेत प्राप्त गर्न सफल भएका छन् । २१ वर्षको कलिलो उमेरमा गोरखा दक्षिणबाहु पुरस्कारका लागि सिफारिसमा परेका भट्टराईले वि.सं.२०६५ सालमा निजामती सेवा पुरस्कार प्राप्त गरे । वि.सं. २०६८ सालमा स्वास्थ्य सेवा पुरस्कार प्राप्त गरेका उनले वि.सं. २०६९ सालमा संचालन भएको ‘न्यानो झोला’ कार्यक्रमका लागि प्रवल जनसेवाश्रीबाट विभुषित भए ।

पुरस्कार र सम्मानहरुले अझ बढी सामाजिक सेवामा लाग्न उत्प्रेरणा दिने गरेको उनी सुनाउँछन् । ‘करोडौं खर्च गरेर पनि प्राप्त हुन नसक्ने पुरस्कारहरु प्राप्त भएका छन् । यसैमा गर्व छ,’ उनी भन्छन्, ‘यस्तै पुरस्कारले निरन्तर सेवामा लाग्न प्रेरणा पनि दिइरहन्छ ।’

१४ वर्ष बझाङ जिल्लामा बसेका उनी ग्रामीण क्षेत्रको स्वास्थ्यको कहालीलाग्दो अवस्थालाई नजिकबाट अनुभूत गरेको बताउँछन् । ‘गाउँमा स्वास्थ्य क्षेत्र कहालीलाग्दो अवस्थामा थियो । म त्यहाँ रहँदा सुत्केरीहरुको अवस्था निकै पिडादायी देखे,’ अनुभव सुनाउँदै भट्टराई भन्छन्, ‘त्यहाँ छँदा पोषणसहितको ‘न्यानो झोला’ कार्यक्रम चलाइयो । यो कार्यक्रमले निकै सफलता पनि पायो ।’ बझाङका स्वास्थ्य संस्थामा रहेर काम गर्दा कामबाट गाउँलेहरु प्रभावित भएको स्मरण गर्दै उनी स्वास्थ्यकर्मी भएकोमा गर्व रहेको बताउँछन् ।

कोभिड–१९ का बिरामी अत्तालिएको देख्दा उनको मन अमिलो हुन्छ । बिरामीहरुलाई निरन्तर हौसला भरिरहन्छन् । किनभने, हौसला नै मुख्य औषधी हो भन्ने व्यवहारमा देखे र भोगेका छन् । महामारीमा फ्रन्टलाइनरका रुपमा काम गरिरहेका भट्टराई कोभिड–१९ भाइरसको जोखिमबाट बच्न सरकारले जारी गरेको स्वास्थ्य प्रोटोकलहरु पालना गर्नुपर्नेमा जोड दिन्छन् । ‘जनस्वास्थ्यका मापदण्ड पालनामा ध्यान पु¥याउनुपर्छ । आतंकित हुनुपर्ने केही छैन्,’ कुराकानी बिट मार्नु पूर्व उनले सुझाए ।


क्याटेगोरी : प्रोफाइल, लुम्बिनी प्रदेश
ट्याग : #केशव भट्टराई, #जनस्वास्थ्य निरिक्षक, #फ्रन्टलाइन


तपाईको प्रतिक्रिया दिनुहोस


ट्रेण्डिङ

जम्मा संक्रमित (नेपाल)
निको भएको
मृत्यु
जम्मा संक्रमित (विश्व)