स्वास्थ्यकर्मीमा संक्रमण पुष्टि भएपछि रामगोपालपुरको स्वास्थ्य चौकी सिल

जनकपुर – स्वास्थ्यकर्मीमा कोरोना संक्रमण पुष्टि भएपछि महोत्तरीको रामगोपालपुर नगरपालिकाले प्राथामिक स्वास्थ्य केन्द्रलाई सिल गरिएको छ । स्वास्थ्य चौकीमा प्राविधिकतर्फ कार्यरत रहेका स्वास्थ्यकर्मीमा कोरोना संक्रमण पुष्टि भएपछि स्वास्थ्य चौकीलाई सोमबार देखि सिल  गरिएको हो ।

नगर स्वास्थ्य संयोजक अच्छेलाल दासका अनुसार स्वास्थ्य चौकीलाई पूर्ण रुपमा सिल गरिएको बताए ।  स्वास्थ्य चौकीलाई शिल गरिएपनि प्रसुती सेवा लगायतका आकस्मिक सेवा भने सुचारु रहने संयोजक दासले बताए ।  जिल्ला जनस्वास्थ्य कार्यालय महोत्तरीका फोकल पर्सन गिरेन्द्र कुमार झाले दिएको जानकारी अनुसार आज महोत्तरीमा तीन जनामा कोरोनाको संक्रमण पुष्टि भएको हो ।

जलेश्वर नगरपालिकाकी दुई महिला र रामगोपालपुर नगरपालिकाको एक पुरुषमा कोरोना संक्रमण पुष्टि भएको प्रवक्ता झाले बताए । महोत्तरीमा संक्रमित हुनेमा ५८ महिला सहित ९ सय ८ पुरुष गरी ९ सय ६६ जना रहेको जिल्ला जनस्वास्थ्य कार्यालयले महोत्तरीले जनाएको छ ।