नेपालगन्ज—भारतमा कोरोना संक्रमण बढेसँगै बाँके फेरि कोभिड—१९ हटस्पट बन्ने जोखिम बढेको छ । बाँकेमा पछिल्लो समय दैनिक कोरोना संक्रमितको तथ्यांक बढ्दैं गएको छ ।
भेरी अस्पताल प्रयोगशालामा गरिएको परीक्षणमा सोमबार बाँकेका मात्रै २४ जनामा कोरोना संक्रमण देखिएको छ । पछिल्लो २४ घण्टामा भेरी अस्पतालमा प्रयोगशालामा गरिएको परीक्षणमा ४१ जनामा कोभिड—१९ संक्रमण देखिएको छ ।
जसमध्ये बर्दियाका ६ जना रहेका छन् । यस्तै, कैलालीका २ जना, दाङका ३ जना, रौतहटका १ जना, सल्यानका २ जना र बारा १ जना, जुम्लाका १ जना र ठेगाना नखुलेका एक जनामा कोरोना पोजेटिभ देखिएको छ ।
पछिल्लो २४ घण्टामा ७८ स्वाब परीक्षण गर्दा ४१ जनामा कोभिड—१९ पोजेटिभ देखिएको हो । पोजेटिभ देखिएका अधिकांश युवा रहेका छन् ।
हिजोमात्रै बाँकेका ५ जनामा कोभिड—१९ पोजेटिभ देखिएको थियो । भारतसँग सीमा नाका जोडिएको पश्चिम नेपालको ठूलो सहर नेपालगन्जमा पनि कोरोना संक्रमित बढिरहेका छन् । जसले बाँके पुनः कोभिड—१९ को उच्च जोखिममा परेको छ ।
