२०८१ असार ३, आईतबार
Health Aawaj logo
गृहपृष्ठलुम्बिनी प्रदेशकोभिड-१९ संक्रमणको जोखिम र चाडपर्वका कारण रक्तदान नहुँदा नेपालगन्जमा रगतको अभाव

कोभिड-१९ संक्रमणको जोखिम र चाडपर्वका कारण रक्तदान नहुँदा नेपालगन्जमा रगतको अभाव


नेपालगन्ज—बाँकेका अस्पतालहरुमा दैनिक ५० देखि ६० युनिट ( पोका ) रगतको माग छ । तर, पछिल्ला दिनहरुमा कोभिड—१९ संक्रमण र चाडपर्वका कारण रक्तदानका कार्यक्रमहरु रोकिँदा ब्लड बैकमै रगतको अभाव हुन थालेको छ ।

रगतको अभाव भएका कारण ब्लड बैकले मागअनुसार बिरामीलाई रगत उपलब्ध गराउन हम्मे—हम्मे परेको छ ।

ब्लड बैकले रगत आवश्यक पर्ने बिरामीका आफन्तहरुलाई रक्तदाता खोजेर ब्लड बैकमा ल्याउन आग्रह गर्दै आएको छ । स्थानीय बिरामीहरुका आफन्तहरुलाई रक्तदाता खोजेर ल्याउन सहज भएपनि टाढाका बिरामीलाई रक्तदाता खोजेर ल्याउन सहज छैन ।

छिमेकी जिल्लाहरुबाट उपचारका लागि बाँकेका अस्पतालहरुमा आएका बिरामीहरुलाई रगत ब्यवस्थापन गर्न गाह्रो भएपछि ब्लड बैकले रक्तदान गर्दै आएका संघ संस्थाहरुलाई रक्तदान कार्यक्रम गर्न आव्हान गरेको छ ।

शल्यक्रिया गरेर प्रसुती सेवा लिने महिला, विभिन्न दुर्घटनामा परेका घाइते, सिकलसेल एनिमिया, थाल्सेमियाका बिरामी र शल्यक्रिया गरेर उपचार गर्नुपर्ने बिरामीका लागि रगत बढी आवश्यक पर्छ ।

रक्तदानका कार्यक्रमहरु सुरु भएपछि केही सहज भएपनि रक्तदानका कार्यक्रमहरुलाई निरन्तरता दिन ब्लड बैकले आग्रह गरेको छ ।
अस्पताल र ब्लड बैकजस्ता भिडभाड हुने स्थानमा कोभिड संक्रमणको जोखिम धेरै हुन्छ । त्यसैले पछिल्ला दिनहरुमा ब्लड बैकका प्राविधिकहरुले रक्तदाताहरुहरुको अनुरोधमा उनीहरुले भनेकै स्थानमा गएर रगत संकलन गर्दै आएका छन ।

रगतको कमीका कारण बिरामीको उपचार सेवा प्रभावित नहोस् भनेर ब्लड बैकले रक्तदान कार्यक्रमहरु संचालन गर्न आव्हान गरेको ब्लड बैक नेपालगन्जका प्रमुख उपेन्द्र रेग्मीले बताए ।


क्याटेगोरी : लुम्बिनी प्रदेश



तपाईको प्रतिक्रिया दिनुहोस


ट्रेण्डिङ