काठमाडौं—स्वास्थ्य तथा जनसंख्या मन्त्रालयले पश्चिम नेपालको ठूलो अस्पतालमध्ये एक भेरी अस्पताल विकास समितिका अध्यक्षलाई हटाउने तयारी गरेको छ । १७ चैतमा स्वास्थ्य तथा जनसंख्यामन्त्री विरोध खतिवडाले मन्त्रीस्तरीय निर्णय गरी अस्पताल विकास समितिका अध्यक्ष प्रमोदकुमार धिताललाई ७२ घण्टे स्पष्टीकरण सोधेका छन् ।
मन्त्रालयले अस्पतालको सर्वागिण विकास, गुणस्तरी सेवा र स्वास्थ्य सेवामा आम नागरिकको पहुँच सरल र सुनिश्चित गर्न नसकेको भन्दैं धिताललाई स्पष्टीकरण सोधिएको हो ।
स्पष्टीकरणमा अस्पतालको काम कारवाहीबाट अस्पतालको क्षमता वृद्धि, सेवा प्रवाहको प्रभावकारिता तथा अस्पताल प्रशासनको व्यवस्थापन एवं सरोकारवालाबाट मन्त्रालय र मन्त्रीसँग गुनासो आएको जनाइएको छ ।
५ वटा प्रश्नहरु सोध्दैं मन्त्रालयले अध्यक्ष धितालाई पदबाट हटाउनुपर्ने कारण नभए लेखेर स्पष्टीकरण पेश गर्न भनेको छ ।
धिताल नेकपा नेतृत्वको सरकारका पालामा भेरी अस्पताल विकास समितिको अध्यक्षमा नियुक्त भएका थिए । उनी नेकपा एमाले निकट हुन् ।
