विराटनगर—प्रदेश १ की नवनियुक्त सामाजिक विकास मन्त्री उषाकला राईले प्रदेश मातहतका सबै अस्पताललाई ५० शैय्यामा स्तरोन्नती गर्ने बताएकी छिन् । मन्त्री राईले सार्वजनिक गरेको प्रथामिकतामा प्रदेश सरकारले झापाको मेची अस्पताललाई २ सय शैय्याको अस्पतालमा स्तरोन्नती गरी प्रादेशिक अस्पतालको रुपमा विकास गर्ने उल्लेख छ ।
मन्त्रालयको पदभार ग्रहण गरेको ६ दिनपछि बुधबार पत्रकार सम्मेलनमा मन्त्री राईले मन्त्रालयका सबै कार्यक्षेत्रलाई समेटेर आगामी प्राथमिकता र कार्यक्रम सार्वजनिक गरेकी हुन् । यस्तै, धनकुटा अस्पताललाई १ सय शैय्याको अस्पतालको रूपमा स्तरोन्नती गर्ने मन्त्रालयको योजना रहेको छ ।
यस्तै, विराटनगरमा रहेको कोशी कोभिड—१९ उपचार केन्द्रलाई पुनः संचानमा ल्याउने मन्त्री राईले जानकारी दिइन् । प्रदेशभित्रका विगतमा कोरोना उपचारमा संलग्न अस्पतालहरुलाई तयारी अवस्थामा राख्न मन्त्री राईले निर्देशन दिएकी छिन् ।
‘एक स्थानीय तह, एक अस्पताल’को अवधारणाअनुसार प्रदेश १ भित्र ४५ वटा १५ वेडको अस्पताल शिलान्यास भएर निर्माणको क्रममा रहेकोले स्तरोन्नती गर्न समन्वय र सहकार्यमा प्रदेश सरकारले पहल गर्ने भएको छ । महिलाहरुमा देखिने प्रजनन स्वास्थ्य समस्या आङ खस्ने, पाठेघरको क्यान्सर, स्तन क्यान्सरको रोगथाम तथा निःशुल्क उपचारको व्यवस्थालाई सहज बनाउने मन्त्रालयको योजना रहेको छ ।
संघीय सरकारबाट प्राप्त कोभिड—१९ को खोप प्राथामिकताको आधारमा लगाउने कार्यक्रमलाई निरन्तरता दिइने भएको छ । मेडिकल शिक्षालाई सर्वसुलभ बनाउन नेपाल सरकारसँग समन्वय गरेर आवश्यक नीति तथा कार्यक्रम बनाएर लागु गरिने मन्त्री राईले बताइन् । संघीय सरकारको ‘एक प्रदेश, एक मेडिकल कलेज’को अवधारणअनुसार प्रदेश १ स्तरीय मेडिकल कलेज सम्भाव्यता अध्ययन गरी कार्यक्रम लागु गरिने प्रदेश सरकारको लक्ष्य रहेको छ ।
हरेक अस्पतालहरुमा स्वास्थ्यजन्य फोहरमैला व्यवस्थापन र समग्र सरसफाइलाई प्राथामिकतामा राख्ने मन्त्री राईले बताइन् । यस्तै, स्वास्थ्य बिमा कार्यक्रमले नसमेटेका र पैसाको अभावमा उपचार गर्न नसक्ने गरिब जनतालाई उपचारको व्यवस्था मिलाउन आवश्यक कार्यविधि र मापदण्ड बनाइ लागु गर्ने मन्त्रालयको योजना छ ।
यस्तै जनस्वास्थ्यलाई दुरगामी असर पार्ने बाह्य वायु प्रदूषण, घरभित्रको वायु प्रदूषण र पेशागत स्वास्थ्यलाई प्राथामिकतामा राख्दै कार्यक्रमहरु संचालन गरिनेछ । दिगो विकास लक्ष्य निर्धारण गरेका स्वास्थ्यका सूचकहरु प्राप्त गर्न समुदायबाटै स्वास्थ्य सेवाको माग वृद्धि गर्दै उपयोगिता बढाउन स्वास्थ्य साक्षरता संचालन गरिनेछ ।
यसैगरी, ‘विद्यालय नर्सिङ सेवा कार्यक्रम’ १४५ विद्यालयहरुमा लागु भइसकेको छ । आगामी वर्षमा यो कार्यक्रम प्राथमिकताको आधारमा थप माध्यमिक विद्यालयहरुको छनोट गरी विस्तार गर्दै लगिने मन्त्री राईले बताइन् ।
