धनगढी—सुदूरपश्चिम प्रदेशका सामाजिक विकास मन्त्री लालबहादुर खड्काको सचिवालयमा कार्यरत एक कर्मचारीले एकै मितिमा ३ जिल्ला भ्रमण गरी दोहोरो भ्रमण भत्ता बुुझेको पाइएको छ ।
मन्त्रीको सचिवालयमा कार्यरत सिअनमी लीलावती विष्ट भाटलाई एकै मितिमा ३ जिल्लाको भ्रमण भत्ता दिइएको छ । लीलावती मन्त्री खड्काको नातामा सम्धिनी पर्छन् ।
हाजिरी रजिष्ट्ररमा २० असार २०७८ देखि २२ असारसम्म बझाङ जिल्लामा काजमा गएको उल्लेख छ । फेरि मन्त्रालयको भ्रमण अभिलेखमा खातामा भने १८ असार २०७८ देखि २२ असारसम्म ५ दिन बैतडी र बझाङ जिल्लामा भ्रमण काज उल्लेख छ । अझ रोचक त के भने २० असार २०७८ देखि २३ असारसम्म ४ दिनको अछाम भ्रमणमा गएको उल्लेख गरिएको छ ।
मन्त्रालय स्रोतकाअनुसार २० असार २०७८ देखि २३ असारसम्मको भ्रमण भत्ता समाजिक विकास मन्त्रालयबाट भुक्तानी हुने गरी सचिव रघुराम बिष्टले स्वीकृत गरेका छन् । त्यस्तै, १८ असार २०७८ देखि २२ असार सम्मको स्वास्थ्य निर्देशनालयबाट भुक्तानी हुने गरी सचिव बिष्टले नै स्वीकृत गरेको स्रोतको दावी छ ।
स्थानीय तहमा खटिएकी भाटलाई मन्त्रालयमा काज ल्याउनु नै गैरकानुनी हो । स्थानीय तहमा दरबन्दी भएका कर्मचारीलाई काजमा प्रदेशअन्तर्गत खटाउँदा संघीय सरकारको अनुमति लिनुपर्छ । तर, नातामा सम्धिनी भएकै आधारमा सामाजिक विकास मन्त्रीमा नियुक्त भएलगतै खड्काले २१ जेठमा भिमदत्त नगरपालिकामा कार्यरत सि.अ.न.मी भाटलाई मन्त्रालयमा खटाउन नगरपालिकालाई पत्र पठाएका थिए ।
सोही पत्रका आधारमा संघीय सरकार अनुमति नलिइ उनलाई मन्त्रालय पठाइएको थियो । संघीय सरकारको अहिलेसम्मको परिपत्र तथा निर्देशनअनुुसार स्थानीय तहमा समायोजन भएका कर्मचारीलाई विशेष परिस्थितीबाहेक सरुवा तथा काम काज सामान्य प्रशासन मन्त्रालले गर्दै आएको छ । प्रदेशको मन्त्रालयले सोझै स्थानीय तहलाई परिपत्र गर्ने व्यवस्था नभएकाले प्रदेशको मुख्यमन्त्री तथा मन्त्रिपरिषद् जानुपर्ने भएकाले सामाजिक विकास मन्त्रीले सोझै परिपत्र गरी कर्मचारी खटाउन भिमदत्त नगरपालिकालाई परिपत्र गरेका थिए ।
मन्त्रीको सचिवालयमा प्रशासन समूहको १ अधिकृत र १ नायब सुब्बाको दरबन्दी मात्रै छ । तर, मन्त्रीको तजबिजमा स्वास्थ्य समूहको कर्मचारीलाई सचिवालयमा राखिएको छ ।
