गौरीफन्टा नाकाबाट आएका तीन जना तिलोत्तमाको क्वारेन्टाइनमा

बुटवल—भारतको मुम्बईबाट कैलालीको गौरीफन्टा नाका हुँदै नेपाल प्रवेश गरेका तीन जना नेपाली तिलोत्तमा नगरपालिकाले सञ्चालन गरेको शंकरनगरस्थित क्वारेन्टाइनमा रहेको पाइएको छ ।

सो नाकाबाट प्रवेश गरेका एक जना नेपालीमा कोरोना संक्रमण पुष्टी भएपछि यहाँबाट फर्किएकाहरुको अवस्था थाहा पाउन सरकारले खोजबिन गरिरहेको छ ।

सुरक्षा निकायसँगको समन्वयमा चैत १२ गतेदेखि शंकरनगर क्वारेन्टाइनमा रहेको उनीहरु नेपाल प्रवेश गरेको सोमबार १४ दिन पुगे पनि उनीहरुको क्वारेन्टाइन बसाईं लम्बिने भएको छ ।

सो नाकाबाट नेपाल प्रवेश गरेका ९ सयमध्ये एक जना नेपालीलाई कोरोना भाइरस संक्रमण देखिएकोले शंकरनगरमा रहेका तीन जनाको क्वारेन्टाइन बसाईं थप ६ दिन लम्बाइएको तिलोत्तमा नगर प्रमुख बासुदेव घिमिरेले जानकारी दिए ।

उनीहरुको नियमित स्वास्थ्य परीक्षण गरिएकोमा हालसम्म कोरोनाको कुनै लक्षण नदेखिएको क्वारेन्टाइनमा रहेका स्वास्थ्यकर्मीलाई उदृत गर्दै नगर प्रमुख घिमिरेले जानकारी दिए ।