चिकित्सकमाथि हातपातका घटनाका दोषीलाई कारवाही गर्न गैर सरकारी चिकित्सक संघको माग

काठमाडौं—गैर सरकारी चिकित्सक संघ नेपालले जोरपाटीस्थित नेपाल मेडिकल कलेजमा चिकित्सकहरुमाथि भएको हातपातको घटनाप्रति ध्यानाकर्षण भएको जनाएको छ । बुधबार एक विज्ञप्ति जारी गर्दै संघले कोरोना महामारीको भयावह अवस्थामा अग्रपंक्तिमा रहेर सेवा प्रदान गर्दै आएका चिकित्सकहरुमाथि हातपात हुनुले कानुनी राज्यको उपहास गरेको जनाएको छ ।

संघका अध्यक्ष डा. याम द्धा र महासचिव रितेश थापाले जारी गरेको उक्त विज्ञप्तिमा घटनाको गम्भीरतालाई बुझेर दोषीमाथि कडा कारवाही गर्न माग गरेको छ ।

संघले कोरोना महामारीको अवस्थामा आफ्नो परिवारको समेत प्रवाह नगरी अहोरात्र लडिरहेका अवस्थामा चिकित्सकमाथि भएको हमलाले निरुत्साहित बनाउने उल्लेख गरिएको छ ।

अहिलेसम्म चिकित्सकमाथि हातपात थुप्रै घटना घटेपनि धैर्यता अपनाउँदैं सेवामा जुटिरहेको बताउँदैं संघले धैर्यतालाई कमजोरी नठान्न समेत आग्रह गरेको छ ।

बुधबार नेपाल मेडिकल कलेजमा बिरामी मृत्युपछि उपचारमा संलग्न दुई जना चिकित्सकमाथि बिरामीका आक्रोशित आफन्तले हातपात गरेका थिए ।