पोखरा हस्पिटलको अनाधिकृत रुपमा सञ्चालित ल्याब तथा फार्मेसी सिल

पोखरा—पोखरा हस्पिटल एन्ड रिसर्च सेन्टर प्रालिले सञ्चालन गरेको ल्याब तथा फार्मेसी कास्की प्रशासनले सिल गरेको छ । दर्ताबिना नै सञ्चालन भइरहेको उजुरी परेपछि कास्की प्रशासनले अनुगमन गरेको थियो ।

अनुगमनका क्रममा आवश्यक कागजात टोली समक्ष पेस गर्न नसकेपछि ल्याब र फार्मेसी सिल गरिएको हो । प्रशासनले बुधबार १० बजेसम्मका लागि दर्ता गरेको प्रमाणसहित कार्यालयमा सम्पर्क गर्न भनेको थियो ।

२ दशक अघिदेखि सञ्चालित उक्त अस्पतालले गत वर्षदेखि फार्मेसी र गत जेठदेखि ल्याब सञ्चालनमा ल्याएको थियो ।

अस्पतालका अध्यक्ष डा. गोपी हिराचन र प्रबन्ध निर्देशक सञ्जय कोइराला रहेका छन् । अस्पतालको ल्याब र फार्मेसी बन्द भएकोबारे अस्पतालको सोधपुछमा सम्पर्क गर्दा हल्लामात्रै भएको दाबी गरे । जबकि कास्की प्रशासनले सिल गरिएको पुष्टि गरिसकेको थियो ।