ललितपुर महानगरपालिकामा घुम्ती शौचालय संचालनमा

काठमाडौँ – ललितपुर महानगरपालिकामा घुम्ती शौचालय संचालनमा आएको छ। महानगरपालिकाको निवर्तमान नगर प्रमुख चिरीबाबु महर्जनको पहलमा मंगलबारबाट  ३ वटा नि:शुल्क घुम्ती सार्वजनिक शौचालय संचालनमा ल्याइएको हो।

सर्वसाधारणको लागि सहज गराउनको निमित्त घुम्ती शौचालय राखिएको नगर प्रहरी प्रमुख सिताराम हाक्षेथुले बताए। ‘सार्वजनिक स्थानहरुमा शौचालयको व्यवस्थापन नहुँदा मधुमेहका बिरामी र वृद्धहरुको कठिन भएको भन्दै पटक-पटक महानगरपालिकामा निवेदन आएको हुँदा निवर्तमान नगर प्रमुख महर्जनको पहलमा घुम्ती शौचालय राखिएको हो, ‘उनले भने।

हाल एउटा घुम्ती शौचालय जाउलाखेलस्थित मतदान केन्द्र नजिक राखिएको छ। शौचालयको सरसफाई महानगरपालिकाको फोहोरमैला व्यवस्थापन विभागले र यसको सुरक्षा नगर प्रहरीले गर्ने भएको छ।

ललितपुरमा जात्रा र महोत्सव जस्ता बेलामा हुने भिडभाडलाई केन्द्रित गरी आवश्यकता अनुसार घुम्ती शौचालय राख्ने बताइएको छ।