जानकी मेडिकल कलेजले निःशुल्क स्वास्थ्य शिविर सञ्चालन गर्दै

जनकपुर—धनुषास्थित जानकी मेडिकल कलेज तथा शिक्षण अस्पतालले निःशुल्क स्वास्थ्य शिविर सञ्चालन गर्ने भएको छ । २९ र ३० जेठमा मेडिकल कलेजले महोत्तरी र धनुषामा दुई दिने निःशुल्क स्वास्थ्य शिविर सञ्चालन गर्न लागेको हो ।

मेडिकल कलेजले इजरायलको नेपालस्थित राजदुतावास र टेल अभिभ सौरस्काइ मेडिकल सेन्टर इचिलोभ हस्पिटल इजरायलसँग मिलेर निःशुल्क स्वास्थ्य शिविर आयोजना गर्न लागेको हो । दुई दिनको उक्त शिविरबाट हजारौंले सेवा लिन सक्ने विश्वास आयोजकको छ ।

शिविरमा मेडिकल कलेजका प्रतिष्ठित चिकित्सक, नर्स तथा स्वास्थ्यकर्मीसँगै इजरायलका प्रतिष्ठित डाक्टरहरुको स्वास्थ्य परीक्षण गर्नेछन् । मेडिकल कलेजका फ्याकल्टी प्रमुख डा रामप्रसाद उप्रेतीले यो शिविरका कारण नागरिकले गुणस्तरीय सेवा पाउनुका साथै नेपाल र इजरायलको सम्बन्धमा थप उचाइ प्रदान गर्ने जानकारी दिए ।

जानकी मेडिकल कलेजले चिकित्सक तथा स्वास्थ्यकर्मीका लागि लक्षित गर्दै तालिमसमेत आयोजना गरेको छ । उक्त तालिममा इजरायलबाट आएका चिकित्सकहरुको टोलीले नयाँ—नयाँ विषयमा जानकारी दिनुका साथै आफ्ना अनुभवसमेत सुनाउने छन् ।