जापानका पूर्व प्रधानमन्त्री आबेमाथि गोली प्रहार, नारा मेडिकल युनिभर्सिटी हस्पिटलमा उपचार हुँदैं

टोकियो-जापानका पूर्व प्रधानमन्त्री सिन्जो आबेमाथि गोली प्रहार भएको छ । शुक्रबार विहानै नारा सहरमा एक सभालाई सम्बोधन गरिरहेका बेला उनीमाथि गोली प्रहार भएको जापानी सञ्चारमाध्यमहरुले जनाएका छन् ।

भाषण गरिरहेका बेला अचानक गोली प्रहार भएपछि उनी त्यही ढलेका थिए । सञ्चारमाध्यमहरुकाअनुसार उनलाई पछाडिबाट दुई वटा गोली हानिएको थियो ।

६७ वर्षीय आबेको स्वास्थ्य अवस्था गम्भीर रहेको बताइएको छ । उनको उपचार नारा मेडिकल युनिभर्सिटी अस्पताल भइरहेको छ । प्रधानमन्त्री फुमिओ किसिदा उनलाई हेर्नका लागि अस्पताल पुगेका छन् ।

प्रहरीले आबेमाथि हमला गर्ने ४२ वर्षीय एक व्यक्तिलाई गिरफ्तार गरेको छ । अहिलेसम्म हमलाको कारण पत्ता लाग्न सकेको छैन ।

जापानमा सबैभन्दा लामो समय प्रधानमन्त्री भएका आबे पहिलो पटक सन् २००६—००७ मा प्रधानमन्त्री बनेका थिए । त्यसपछि उनी सन् २०१२ देखि सन् २०२० सम्म जापानको प्रधानमन्त्री बने । आबेले प्रधानमन्त्रीका रुपमा ९ वर्ष जापानको नेतृत्व गरेका थिए । उनी लिबरल डेमोक्रेटिक पार्टीसँग आवद्ध छन् ।