स्वास्थ्य मन्त्रालयले भन्यो, ‘एमपक्स रोगसँग मिल्दा लक्षण देखिए तत्काल स्वास्थ्य संस्थामा सम्पर्क गर्नु’

काठमाडौं—स्वास्थ्य तथा जनसंख्या मन्त्रालयले एमपक्स रोगसँग मिल्ने लक्षण देखिएमा तत्काल स्वास्थ्य संस्थामा सम्पर्क गर्न भनेको छ । नेपालमा एक जना विदेशी महिलामा एमपक्स रोग पुष्टि भएपछि मन्त्रालयले एमपक्ससँग मिल्दा लक्षणहरु देखिएमा स्वास्थ्य संस्थामा सम्पर्क गर्न भनेको हो ।

मन्त्रालयले एमपक्ससँग मिल्ने लक्षण देखिएमा मन्त्रालयको कल सेन्टर १११५ र ११३३ मा सम्पर्क गरेर परामर्श लिन सक्ने जनाएको छ ।

नेपालमा पहिलो पटक देखिएको उमपक्स ११२ देशमा पुष्टि भइसकेको छ । एमपक्स हुँदा ज्वरो आउने, सामान्य ज्वरो सुरु भएको १ देखि ३ दिनभित्रमा छाला, अनुहार, हत्केला र पैतलामा डाबर देखा पर्ने, डाबर परिवर्तन हुँदै फोका हुँदै पाप्रा लागेर उप्किने, टाउको, डाढ र मांसपेशी दुख्ने र शरीरका ग्रन्थी बढ्नेजस्ता लक्षण देखिन्छन् ।