नुवाकोट—नुवाकोटको शिवपुरी गाउँपालिका—६, समुद्रदेवीमा आयोजित निःशुल्क दन्त शिविरमा ६६ जनाले दाँतको परीक्षण तथा उपचार गराएका छन् । २७ असोजमा आयोजित शिविरमा दाँत निकाल्ने, भर्ने तथा सफा गर्नेलगायतका सेवा प्रदान गरिएको थियो ।
बीएम फाउन्डेसनको आयोजनामा तथा रोटरी क्लब अफ न्यातपोल, रोटरी क्लब अफ ग्रिनल्यान्ड काठमाडौं, रोटरी क्लब अफ बूढानीलकण्ठ र रोटरी क्लब अफ काठमाडौं नर्थको सहआयोजनामा शिविर सञ्चालन गरिएको हो । कार्यक्रममा कान्तिपुर डेन्टल कलेजको प्राविधिक सहयोग रहेको थियो ।
रोटरी इन्टरनेसनल डिस्ट्रिक्ट ३२९२ को डिजिज प्रिभेन्सन एन्ड ट्रिटमेन्ट कमिटीका सदस्य तथा बीएम फाउन्डेसनका संस्थापक डा. बुद्धिमान श्रेष्ठले कार्यक्रमको समन्वय गरेका थिए ।
शिविरमा दुई जना दन्त विशेषज्ञ, छ जना चिकित्सक, एक जना डेन्टल हाइजिनिस्ट, एक जना स्वास्थ्य सेवा व्यवस्थापक र एक जना चालकसहितको टोली परिचालन गरिएको थियो ।
शिविरमा १५ जनाको दाँत निकालिएको, १८ जनाको दाँत भरिएको र ११ जनाको दाँत सफा गरिएको र १८ जनालाई औषधि प्रेस्क्राईब गरी अस्पतालमा रेफर गरिएको आयोजकले जनाएको छ । त्यस्तै, ६६ जनाको दन्त परीक्षण गर्दा १००५ सेवाग्रहीमा दाँत किराले खाएको (दन्त सडन) भेटिएकोले सबैलाई मुख तथा दाँतको स्वास्थ्यसम्बन्धी शिक्षा प्रदान गरिएको थियो।
ग्रामीण क्षेत्रमा दन्त स्वास्थ्य सेवाको पहुँच विस्तार गर्ने र स्थानीय बासिन्दालाई मुख तथा दाँतको सरसफाइप्रति सचेत बनाउने उद्देश्यले शिविर सञ्चालन गरिएको डा. श्रेष्ठले बताए।
