विराटनगर—विराट मेडिकल कलेज टिचिङ हस्पिटलअन्तर्गतको विराट क्यान्सर इन्स्टिच्युटले पूर्वी नेपालमै पहिलो पटक थोरासिक अंकोसर्जरी (फोक्सो तथा छाती सम्बन्धी क्यान्सरको शल्यक्रिया) सेवा सुरु गरेको छ ।
यससँगै फोक्सोको क्यान्सरका जटिल शल्यक्रियाका लागि काठमाडौं वा विदेश धाउनुपर्ने बाध्यता हट्ने हस्पिटलले जनाएको छ ।
यस सेवाको नेतृत्व जीआई–एचपीबी अंकोसर्जन, ब्रेस्ट अंकोसर्जन तथा साइटोरिडक्टीभ एण्ड हाइपेक सर्जन डा. शिवराज शर्माले गरेका छन् । उनले भारतको टाटा मेडिकल सेन्टर, कोलकताअन्तर्गतको थोरासिक अंकोसर्जरी विभाग र चीनको सांघाई पल्मोनरी अस्पतालबाट युनिपोर्टल भ्याट्स एण्ड ¥याट्स सम्बन्धि प्रतिष्ठित फेलोसीप तालिम सफलतापूर्वक सम्पन्न गरी विराट क्यान्सर इन्स्टिच्युटमा पुनः आफ्नो सेवा सुरु गरेका हुन् ।
हस्पिटलमा वरिष्ठ फोक्सो एवं श्वासप्रश्वास तथा निद्रा रोग विशेषज्ञका रुपमा प्रा. डा. पुरु कोइराला र डा. रेजिना शाही रहेका छन् । फेलोसीपबाट प्राप्त आधुनिक ज्ञान, सीप र अन्तर्राष्ट्रिय अनुभवका आधारमा अब बीसीआईमा फोक्सोको क्यान्सरसँगै छाती सम्बन्धी विभिन्न क्यान्सरका जटिल शल्यक्रिया विशेषज्ञ सेवासहित उपलब्ध रहेको अस्पतालले जनाएको छ । टिममा अंको सर्जन डा. जगरनाथ चौधरी, अंको एनेस्थेसियोलोजिस्ट डा. रुजन बम र अंको–फिजियोथेरापिस्ट अस्मिता श्रेष्ठ रहेका छन् ।
विराट क्यान्सर इन्स्टिच्युटमा यसअघि नै सर्जिकल अंकोलोजी, मेडिकल अंकोलोजी तथा हेमाटोलोजी, क्लिनिकल अंकोलोजी, रेडिएसन अंकोलोजी, किमोथेरापी र न्युक्लियर मेडिसिन, इन्टरभेन्सनल रेडियोलोजीलगायतका सेवा सञ्चालनमा रहेका छन् । थोरासिक अंको सर्जरी सेवा थपिएसँगै संस्थाले पूर्वी नेपालका बिरामीलाई अझ व्यापक र समग्र क्यान्सर उपचार उपलब्ध गराउने दिशामा अर्को महत्वपूर्ण उपलब्धि हासिल गरेको छ ।
फोक्सोको क्यान्सरको शल्यक्रिया दूरबिन (भ्याट्स) प्रविधिबाट गरिने र निकट भविष्यमा रोबोटिक सर्जरीसमेत सुरु गर्ने डा. शर्माले बताए । यसैगरी, श्वासप्रश्वास नली नजिकको गिर्खा पत्ता लगाउन इबस (EBUS) जाँच सेवा पनि उपलब्ध रहेको अस्पतालले जनाएको छ ।
अस्पतालमा क्यान्सर सम्बन्धी अनुभवी चिकित्सकहरूको टिम रहेकाले अब पूर्वी नेपालका बिरामीले जटिल शल्यक्रियाका लागि बाहिर जानुपर्ने बाध्यता हट्ने हस्पिटलको विश्वास छ ।
अस्पताल प्रशासनका अनुसार अन्तर्राष्ट्रियस्तरको फेलोसीप तालिम लिएका अंकोसर्जनदेखि अंको एनेस्थेसियोलोजिस्ट र अंको–फिजियोथेरापिस्टसम्मको समर्पित टिम एकै ठाउँमा उपलब्ध हुनु विराटको सबैभन्दा ठूलो विशेषता हो । साथै, सर्जिकल, मेडिकल, क्लिनिकल तथा रेडिएसन अंकोलोजी, किमोथेरापी, न्युक्लियर मेडिसिन र अब थोरासिक अंको सर्जरीसमेत एकै संस्थामा उपलब्ध हुँदा बिरामीलाई उपचारका लागि यता र त्यता धाउनुपर्ने झन्झट पर्दैन् । हस्पिटलमा फोक्सोको क्यान्सर, छातीको ट्युमर, खाद्य नली, पेट, पित्तनली र मलद्वारसम्बन्धी लगायत शल्यक्रिया गरिन्छ ।
दूरबिन (भ्याट्स) प्रविधिबाट हुने शल्यक्रिया र निकट भविष्यमा थपिने रोबोटिक सर्जरी सुविधाले ठूला सहरका अस्पतालमा मात्र पाइने आधुनिक उपचार अब पूर्वी नेपालमै सुलभ बनाएको छ । इबस जस्ता जाँच सेवाले फोक्सो तथा श्वासप्रश्वास नली नजिकको गिर्खा प्रारम्भिक अवस्थामै पत्ता लगाउन सघाउने भएकाले उपचार सफलताको सम्भावना पनि बढ्ने चिकित्सकहरूको भनाइ छ । यसबाहेक, काठमाडौं वा विदेश धाउनु नपर्दा बिरामी र तिनका परिवारको यात्रा खर्च, समय र मानसिक तनाव समेत घट्ने हस्पिटलको दाबी छ ।
