गेटा मेडिकल कलेजलाई स्वास्थ्य विज्ञान प्रतिष्ठान बनाउन सकिन्छ : स्वास्थ्य मन्त्री ढकाल

धनगढी—स्वास्थ्य तथा जनसंख्यामन्त्री भानुभक्त ढकाल र उद्योग, वाणिज्य तथा आपूर्तिमन्त्री लेखराज भट्टले बुधबार कैलालस्थित गेटा मेडिकल कलेजको निरिक्षण गरेका छन् ।

निरिक्षणको क्रममा मन्त्री ढकालले गेटा मेडिकल कलेजलाई स्वास्थ्य विज्ञान प्रतिष्ठान बनाउन सकिने बताए । ‘मेडिकल कलेजलाई छिट्टै विज्ञान प्रतिष्ठानको रुपमा रुपान्तरण गर्न सकिन्छ’, उनले भने । उनले यो मेडिकल कलेज निर्माणमा यस प्रदेशवासीदेखि निर्माणको काम गर्ने कामदार सबैको महत्वपूर्ण भूमिका रहेको चर्चा गर्दै सबैलाई धन्यवादसमेत दिए ।

उद्योगमन्त्री भट्टले यसअघि स्वास्थ्य विज्ञान प्रतिष्ठानको प्रस्ताव अगाडि बढन नसकेका कारण समिति गठन गरेर मेडिकल कलेजको रुपमा निर्माण कार्य सुरु गरिएको बताए ।

उनले गेटा मेडिकल कलेजलाई स्वास्थ्य विज्ञान प्रतिष्ठान बनाउनका लागि पहल गर्न मन्त्री ढकाललाई आग्रह गरेका छन् । मेडिकल कलेज अनुगमनका क्रममा गेटा मेडिकल कलेज पूर्वाधार निर्माण समितिका कार्यकारी निर्देशक भीमबहादुर साउँदले हालसम्म ६५ प्रतिशतभन्दा बढी भौतिक प्रगति भएको जानकारी गराए ।