स्वास्थ्य सेवा कार्यालय मुगुमा आकस्मिक बाहेकका अन्य सेवा ठप्प

सुर्खेत– स्वास्थ्य सेवा कार्यालय मुगुमा आकस्मिक बाहेक अन्य सेवा ठप्प भएका छन् । स्वास्थ्य सेवा कार्यालयमा कार्यरत एक जना कर्मचारीलाई कोरोना संक्रमण पुष्टि भएपछि जिल्ला अस्पताल मुगुमा मंगलबारदेखि आकस्मिक बाहेकका अन्य सबै सेवा एक हप्ताका लागि ठप्प गरेको स्वास्थ्य सेवा कार्यालय मुगुले जनाएको छ ।

स्वास्थ्य कार्यालयमा कोरोना पोजेटिभ भेटिएपछि जिल्लामा संक्रमण नफैलियोस भनेर अस्पतालको आकस्मिक सेवा बाहेक अन्य सबै १ हप्ताका लागि बन्द गरेको स्वास्थ्य सेवा कार्यालय मुगुका सुचना अधिकारी पर्शुराम नेपालीले बताए ।

मुगु अस्पताल र स्वास्थ्य कार्यालयमा कार्यरत स्वास्थ्यकर्मी चिकित्सक नर्स, अनमी र स्थानीय लगायत ६२ जनाको स्वाब संकलन गरी पिसीआर परीक्षणका लागि कर्णाली स्वास्थ्य विज्ञान प्रतिष्ठानमा पठाउँदा एक कर्मचारीमा संक्रमण पुष्टि भएको जिल्ला स्वास्थ्य सेवा कार्यालयले जनाएको छ ।

कोरोना पोजिटिभ कर्मचारीलाई उपचारका लागि सोमबारदेखि नै आइसोलेसनमा राखेर उपचार सुरु भईरहेको नेपालीले जानकारी दिए । यो सँगै एक साताका लागि गमगढी बजारमा निषेधाज्ञा जारी गरिएको छ ।