स्वास्थ्य परीक्षणसमेत नपाएकी गर्भवती बालिका जीवनरक्षाको माग गर्दै

जुम्ला–एक जना १६ वर्षीया गर्भवती बालिकाले जीवन रक्षाका माग गर्दै सामाजिक सञ्जालमा आफ्नो भिडियो सार्वजनिक गरेकी छन् । उनले गत वर्षको चैत महिनामा सुर्खेतस्थित कुर्मी भन्ने ठाउँका २० वर्षीय झेरी मगरसँग वालविवाह गरेकी हुन् ।

उनका पति अहिले भारतमा सम्पर्कविहीन छन् । ७ महिनाको पेटमा बच्चा भएकाले सुत्केरी हुने समय नजिकिदैं गएपछि उनले जीवन रक्षाको माग गरेकी हुन् ।

गर्भावस्थामा स्वास्थ्य परीक्षण नभएको, स्वास्थ्य कमजोर हुँदै गएको र आफन्त कोही नभएको भन्दै सामाजिक सञ्जालमा जीवन रक्षाका लागि आग्रह गरेको उनले बताइन् ।

गर्भवती बालिकाले जीवन रक्षाका लागि सामाजिक संजालमा आग्रह गरेको थाहा पाएपछि बालिकाको खोजी गरेको पत्रकार महासंघ जुम्लाका उपाध्यक्ष दिलमाया शाहीले बताइन् । उनले भनिन् ‘बाललिकालाई सम्पर्कमा ल्याएर आधारभूत सहयोगको पहल भएको छ ।’ ती बालिकालाई उपाध्यक्ष शाहीले आफू बस्ने घरमा ल्याएर आफ्नो कोठामा आश्रय दिएकी छन् ।

महासंघका उपाध्यक्ष शाहीले ती बालिकाको बारेमा स्थानीय प्रशासन र सरोकारवाला निकायमा जानकारी गरेको बताइन् । कर्णाली स्वास्थ्य विज्ञान प्रतिष्ठान शिक्षण अस्पतालमा ७ महिनाको गर्भ पहिलोपटक चेक जाँच भएको छ । डाक्टरले आमा र बच्चाको स्वास्थ्य जोखिमपूर्ण अवस्थामा रहेको बताएका छन् ।

गर्भवती बालिका जुम्लाको बसपार्कमा कोठाभाडामा बस्दैं आएकी थिइन् । विवाहपछि पति घरमा नहुँदा घरमा सासु, ससुराले हिंसा गर्न थालेपछि आफू आश्रय लिन जुम्ला माइती घर आएको बालिकाले बताइन् ।

सहायक प्रमुख जिल्ला अधिकारी प्रमिला रिजालका अनुसार आवास, पेस नेपाल जुम्लासँग समन्वय गरी गर्भवती बालिकालाई सुर्खेतस्थित आवासको सेफ हाउसमा राख्ने पहल भइरहेको छ । कनकासुन्दरी गाउँपालिका महिला शाखा र वडाको सिफारिसको आधारमा जिल्ला प्रशासनको सिफारिसमा आवासको सेफ हाउसमा राख्ने तयारी भइरहेको छ ।

बुबाको आत्महत्यापछि परिवारको बिचल्ली

बालिकाको बुवा भेडा, बाख्रा बिक्रीवितरण गर्ने व्यापारी हुन् । गाउँघरबाट भेडा, बाख्रा खरिद गरेर जुम्लाको सदरमुकाम खलंगामा ल्याएर बिक्री वितरण गर्दै आएको थिए ।

डेढ वर्षअघि मासु काट्ने व्यापारीले भेडा, बाख्रा लिएको थियो । पछि पैसा नै नदिएर मासु काट्ने व्यापारी भागेपछि गाउँघरको ऋण तिर्न नसकेर बुवाले आत्महत्या गरेको ती बालिकाले बताइन् ।

बालिकाले भनिन्, ‘बुबाले भेडा, बाख्रा खरिदका लागि लिएको ऋण छ । त्यो ऋण तिर्न सक्ने अवस्था छैन । अहिले साहुले मागेका छन् । यस्तै अवस्थाले गर्दा आमा डिप्रेसनमा पर्नु भएको छ ।’ उनका तीन जना भाइबहिनी छन् ।