वीरेन्द्रनगर—कर्णाली प्रदेशको आफ्नै प्रयोगशाला सञ्चालनमा ल्याएको छ । विगतमा कुनै पनि रोग परीक्षण गर्ने प्रयोगशाला नहुँदा रोग निदानका लागि परीक्षण गर्न बाहिर जानुपर्ने बाध्यता रहेको थियो ।
प्रयोगशाला नहुँदा प्रदेश बाहिर कुनैपनि रोगको परीक्षण गर्न पठाउनुपर्ने अवस्था रहेकोमा अब प्रदेशको आफ्नै प्रयोगशाला सञ्चालनमा आएपछि सहज हुने भएको छ ।
शुक्रबार कर्णाली प्रदेशका सामाजिक विकास मन्त्री टेकराज पछाईंले प्रदेश जनस्वास्थ्य प्रयोगशालाको उद्घाटन गरेका छन् ।
मन्त्री पछाईंले प्रदेश जनस्वास्थ्य प्रयोगशालालाई थप उपकरणयुक्त बनाएर गुणस्तरीय सेवा प्रदान गराउन पहल गरिने बताए । ‘प्रयोगशाला सञ्चालनमा आएपछि प्रदेशभित्रै परीक्षण तथा अनुसन्धान गर्न सहयोग पुग्नेछ,’ उनले भने, ‘प्रयोगशालालाई अन्वेषण केन्द्रको रुपमा पनि विकसित गर्न लागिएको छ ।’
यहाँबाट जनस्वास्थ्य सम्वन्धी रोगको छिटो पहिचान गरी रोग नियन्त्रणमा सघाउने प्रयोगशालाका निर्देशक वृषबहादुर शाहीले बताए । ‘अब अन्य प्रदेशमा परीक्षण हुन नसकेको काम पनि यही प्रयोगशालाबाट हुनेछ,’ उनले भने, ‘अब रोगको परीक्षण गर्न बाहिर जानुपर्ने छैन ।’
प्रयोगशालामा ९ जना प्राविधिकहरुको दरबन्दी भएपनि हाल तीन जना मात्रै पदपूर्ति भएको छ । अन्य गरी कुल १६ जना जनशक्ति छन् ।
प्रयोगशालाका ल्याब टेक्निसियन एवं सूचना अधिकारी घनश्याम गिरीले प्रयोगशालामा नसर्ने रोग, संक्रामक रोग, गुणस्तर नियन्त्रण तथा तालिम र आर्थिक प्रशासनको काम हुने बताए ।
‘प्रयोगशालाबाट निदात्मक, अनुसन्धानमूलक र अनुगमनको काम गरिने छ,’ गिरीले भने, ‘दुर्गम तथा पिछडिएको क्षेत्रको जनतामा विश्वसनीय सेवाको पहुँच बढाउन, आफ्नै ठाउँमा सेवा दिएपछि रकम बचत हुने र समयमै रोग पत्ता लागेपछि औषधिको अनुचित प्रयोग रोक्न प्रयोगशालाको कामले सहयोग पुग्नेछ ।’
प्रयोगशालामा अन्यत्र भएका झण्डै आधा रकममा रगत, दिसा पिसाब, खकारलगायतको परीक्षण हुने जनाइएको छ ।
