जुम्ला—हिमा गाउँपालिकाको कालिका खेतुमा तीन दिने निःशुल्क आँखा शिविर सञ्चालन गरिएको छ । आर्थिक अभावले आँखाको उपचारबाट बञ्चित भएका जेष्ठ नागरिकलाई राहत पुग्ने उद्देश्यले प्रथामिक स्वास्थ्य केन्द्र कालिका खेतुमा शिविर सञ्चालन गरिएको हो ।
शिविर सोमबारदेखि बुधबारसम्म सञ्चालन हुनेछ । सिंजा भेगका तीन पालिका हिमा, सिंजा र कनकासुन्दरीका एक सय नागरिकको राहतका लागि शिविरको आयोजना गरिएको हो ।
हिमा गाउँपालिका स्वास्थ्य शाखा संयोजक रतनबहादुर रावतका अनुसार एक सय जनाको स्किन टेस्ट गरिएको र पहिलो दिन जाँच गरी दोस्रो र तेस्रो दिन शल्यक्रिया गरिनेछ । ९५ जनाको आँखा जाँच र ३५ जनाको शल्यक्रिया गरिदैंछ ।
हिमा गाउँपालिका अध्यक्ष लक्ष्मण शाहीले हिमालय आँखा अस्पताल पोखराको सहयोग र पालिकाको आयोजना वर्षमा दुई पटक नि:शुल्क आँखा शिविर सञ्चालन गर्दै आएको बताए । उनले भने, ‘स्वास्थ्य र शिक्षा क्षेत्रलाई प्रथामिकता दिएर हामी काम गरिरहेका छौं ।’
गाउँमै मोति बिन्दुको शल्यक्रिया सेवा पाउँदा हिमाका ८० वर्षीय मुनवीर नाथ योगीले साहत मिलेको बताए । उनले भने, ‘आँखा देख्न छोडेको धेरै समय भएको थियो । सुर्खेत, नेपालज्ज गएर उपचार गर्न सक्ने अवस्था छैन । अहिले गाउँमै आँखा उपचार भएपछि सहज भएको छ ।’ हिमालय आँखा अस्पतालबाट शिविर प्रमुख सुवास नेपालको नेतृत्वमा आँखा विशेषज्ञ चिकित्सकको टोली जुम्ला पुगेको छ ।
