काठमाडौं—सरकारले कोरोना भाइरस (कोभिड—१९) महामारी सुरु भएसँगै तीन सय शैय्याको सरुवा रोग अस्पताल बनाउने निर्णय भएको थियो । मन्त्रिपरिषद्ले २० माघमा सरुवा रोग नियन्त्रणका लागि ३ सय शैयाको अस्पताल बनाउन सैद्धान्तिक सहमति दिएको थियो ।
देशको एक मात्रै संक्रामक रोग अस्पताल घना बस्तीभित्र भएपछि त्यसलाई बस्तीभन्दा पर सार्ने भनिएपनि अझै प्रक्रिया अघि बढेको छैन । टेकु अस्पताल एक सय शैय्याको हो । तर, कोभिड—१९ ले सामाजिक दूरी कायम गरी बेडको व्यवस्थापन गर्नुपर्दा ७५ बेड मात्रै संचालनमा छ ।
नयाँ भवन निर्माण गर्न अस्पतालले ५७ करोड लागत अनुमानसहितको गुरुयोजना तयार गरी स्वास्थ्य तथा जनसंख्या मन्त्रालयमा पठाएको थियो । तर, मन्त्रालयले सो गुरुयोजना समेत स्वीकृत नगरेको महालेखाले औल्याएको छ । अस्पतालका प्रमुख डा. सागर राजभण्डारीका अनुसार भवन निर्माणबारे कुनै पत्र आएको छैन । ‘तीन वर्ष भित्र बनाइसक्ने भनिएको छ, जग्गा समेत भेटिएको छैन्,’ निर्देशक राजभण्डारी भन्छन्, ‘औपचारिक रुपमा कुनै पत्र मन्त्रालयबाट आएको छैन । कोरोनाका लागि बन्ने अस्पताल उसैले निर्माण कार्य रोकेजस्तो छ ।’
प्रत्येक वर्ष सरुवा रोगका बिरामी बढ्दै जाने मात्रै होइन्, नयाँ संक्रामक रोग समेत देखा पर्न थालेका छन् । ‘हाल महामारीका रुपमा विश्वभर फैलिएको कोरोना भाइरस, सार्सजस्ता भाइरसबाट सुरक्षित रहन टेकु अस्पतालको क्षमता विस्तार अति आवश्यक छ,’ महालेखाले प्रतिवेदनमा भनेको छ । उच्च संक्रमणजन्य रोगको उपचार हेपाफिल्टर (वार्डलाई आइसोलेटेड गर्ने मेसिन)सहितको सुरक्षित आइसोलेसन कक्षबाट गर्नुपर्छ । तर, शुक्रराज अस्पतालले आइसोलेसन तथा आईसीयु वार्डका उपकरण, आईसीयु भेन्टिलेटर मेसिन खरिद गरेको छ ।
