स्वास्थ्यकर्मीलाई दुर्व्यवहार गरे कारवाही हुने

जनकपुर-कोरोना विरुद्धको लडाइमा फ्रन्टलाइनमा रहेका स्वास्थ्यकर्मी र नर्सहरुमाथि दुर्व्यवहार हुन थालेपछि धनुषा प्रशासनले एक्सन लिने भएको छ । धनुषाका प्रमुख जिल्ला अधिकारी प्रेमप्रसाद भटटराईले डेरामा बस्ने स्वास्थ्यकर्मीहरुलाई घरबेटीहरुले दुर्व्यवहार गर्ने गरेको घटनाहरु जानकारीमा आएकोले त्यसो नगर्न आग्रह गरेको छन् ।

घरबेटीहरुले स्वास्थ्यकर्मीहरुलाई डेराबाट निकाल्ने धम्की दिने, कोठामा बस्न नहुनेलगायतको धाक, धम्कीसहित घर खाली गर्न दबाब दिदै आएको सूचना जिल्ला प्रशाासन कार्यालय धनुषामा आइरहेकोले त्यस्ता घरवेटीहरुलाई धनुषा प्रशासनले सचेत गराएको छ ।

साथै, जिल्ला प्रशासन कार्यालय धनुषाले साउन ३२ गते राति १२ बजेदेखि भदौ ७ गते राति १२ बजेसम्मको लागि लकडाउन थप गर्ने निर्णय गरेको छ । स्थानीय प्रशासन ऐन, २०२८ को दफा ६(३) बमोजिम जिल्लाभर लकडाउन लगायतको ४ बुँदे निर्णय गरेको छ ।