२०८१ असार ३०, आईतबार
Health Aawaj logo
गृहपृष्ठसमाचारकोरोना परीक्षणकाे फ्रन्टलाइनमा खटिँदा कैयौं रात प्रयोगशालामै बिते

कोरोना परीक्षणकाे फ्रन्टलाइनमा खटिँदा कैयौं रात प्रयोगशालामै बिते


नेपालमा गत बैशाखमा कोरोना भाइरस (कोभिड–१९) का कारण सिन्धुपाल्चोककी सुत्केरी महिला र नेपालगन्जका १५ वर्षिय युवकको मृत्युपछि आम मानिसमा एकाएक डर, त्रास र अन्योलको अवस्था सिर्जना भयो ।

जेठको पहिलो साता तेस्रो संक्रमितको निधन भयो । उनी गुल्मी जिल्ला मदाने गाउँपालिकाका शिक्षक थिए । हाल म त्यही जिल्लामा कार्यरत छु । त्यसपछि गुल्मीमा डरको ग्राफ उकालो लाग्यो । कोरोनाबारे मानिसहरु अनेक अड्कल काट्थे । कोभिड–१९ बारेमा मानिसहरुमा पर्याप्त जानकारी थिएन । जसले जे सुनेको छ त्यही बोल्थे । तथ्यभन्दा अफवाहले माहोल सन्त्रास बनाएको थियो ।

जिल्लाभित्र कोरोना संक्रमितको निधनले हामी स्वास्थ्यकर्मीमाथि थप जिम्मेवारी थपियो । आवश्यक समन्वयपछि कन्ट्राक्ट ट्रेसिङको काम सुरु भयो । तर, सबैमा डर थियो । स्वाब संकलन गरी परीक्षण गर्नुपर्ने भएकाले गुल्मी अस्पतालका प्रमुख डा. उत्तम पच्याको टीमसहित म स्वाब संकलनका लागि मृतकको गाँउतिर लाग्यौँ । हामी आत्मविश्वास र जिम्मेवारी बोधका साथ काममा खटिएका थियौं ।

तर, मनको कुनामा कतै आफूपनि संक्रमित भइने त होइन भन्ने डर जीवित थियो । अझै घर परिवारले लिने पीर, तनावको त कुरै नगरौं । अस्पतालका सहकर्मीहरु पनि डराइरहेको स्थिति थियो । अझ भनौं उपचार, परीक्षण लगायतमा काममा देशभरका स्वास्थ्यकर्मीको स्थिति प्रायः एउटै थियो ।

हामीले मदाने गाँउपालिकाको सो ठाउँबाट गरिएको स्वाबको नतिजा केही समयपछि आयो । जसमा रिपोर्ट पोजेटिभ आयो । जसले जिल्लामा फेरी त्रासको वातावरण सिर्जना गर्याे । संक्रमित व्यक्तिलाई सो ठाउँबाट राती नै हाल कोभिड–१९ परीक्षण गर्ने ल्याब, साविकको आइसोलेसनमा ल्याइयो । त्यतिबेलासम्म मेरो मोवाइलमा सयौं कलहरु आए । कारण मैले स्वाब संकलन गरेको व्यक्तिको रिपोर्ट पोजेटिभ आएको थियो ।

यसपछि मेरो घरपरिवारले गरेको पीर, देखाउनुभएको मायाले म आफैलाई केही डर त लाग्यो तर आत्मविश्वास दह्रो बनाएँ । मनोबल उच्च पारें । पेशागत दायित्वलाई सम्झिएँ । घरमा भर्खरै जन्मिएको छोराबाट आइसोलेट भएर म छुट्टै बस्न थाले । श्रीमती मुनाले त्यतिबेला मलाई हरतरहले सहयोग गरिन् ।

उनी डराउथिन् तैपनि मैले कन्भिन्स गर्थे । त्यसपछि उनी मलाई काममा प्रेरणा भर्थिन् । छोरासँग देखादेख मात्रै हुन्थ्यो । घरबाट बुबाआमा उत्तिकै पीर लिनुहुन्थ्यो । बरु जागिरै नगर भन्नेसम्मको कुरा गर्नुहुन्थ्यो । म उहाँहरुलाई मेरो पेसा र जिम्मेवारी यस्तै भएकोले पीर नलिनुस् भन्दै सम्झाउथें । तैपनि बुबा आमाको सन्तानप्रतिको माया न हो उहाँहरु मनले नमानेपनि मेरो आत्मविश्वासप्रति भने सहमत हुनुहुन्थो । परिवारको मायाले झनै सर्तकताका साथ काम गर्न उर्जा मिल्थ्यो ।

सरकारको गाइडलाइनमा कन्ट्राक्ट ट्रेसिङलाई प्राथमिकतामा राखिएको थियो । त्यसैले सुरुवाती चरणमा म गुल्मीका प्रायः सबै ठाउँमा गई स्वाब संकलन गरें । त्यतिबेला जिल्लामा म मात्रै तालिमप्राप्त भएकाले मैले अन्य पालिका र आफ्नै अस्पतालका कर्मचारीलाई प्रशिक्षित गर्दे आइरहेको थिएँ ।

सुरुसुरुमा म आफै सबै ठाउँमा पुग्नुपर्ने बाध्यता बिस्तारै हट्दै गयो । नभए अनिदों रहेर २४ सै घण्टा काममा खटेको सम्झना अझै ताजा छ । खासमा स्वाब संकलन मात्रै सुनिएपनि त्यसपछिका आफ्नै काम अझै धेरै हुन्छन् । स्वाबको पहिचानका लागि फरक–फरक फर्मको उचित व्यवस्थापन गर्नुपथ्र्याे । केही तलमाथि भए यसले झन् खराब परिस्थितिको सिर्जना गथ्र्याे । तसर्थ, यसमा हामी निकै सजक बन्नु पथ्र्यो ।

देशभरमा स्वाबको चाप बढी हुन थालेपछि कोभिड परीक्षणको रिपोर्ट निकै ढिलो गरी आउन थाल्यो । त्यसैलाई मध्यनजर गर्दे गुल्मीमा पनि कोभिड परीक्षण प्रयोगशाला सञ्चालन गर्ने प्रक्रिया अघि बढ्यो । यसबीचमा ल्याबको स्थापनामा मैले आफ्नो ठाउँबाट सक्रियतापूर्वक भूमिका खेलें ।

यो क्रममा भैरहवाका कोभिड ल्याब इन्चार्ज लक्ष्मण पंन्थीको सहयोग अविस्मरणीय थियो । उहाँबाट मैले धेरै कुरा सिकें र फोनमै ल्याबको संरचनाका बारेमा समेत सल्लाह लिएँ । पछि उहाँसँगै काम गर्ने अवसर मिल्यो जसले मेरो व्यवहारिक ज्ञानलाई थप बलियो बनायो ।
कोभिड–१९ ल्याबको संरचना स्थापना गरेर संचालनमा ल्याउन भनेजस्तो सजिलो थिएन । यो निकै महंगो र खर्चिलो भएकाले यसमा अनेक कठिनाइको सामना गर्नुपर्यो ।

यसमा गुल्मी अस्पतालका प्रमुख डा. उत्तम पच्या, रेसुंगा नगरपालिकाको समग्र टीम, उपकरणको व्यवस्थापन÷संचालनको तारतम्य मिलाउने बायोमेडिकल टीम, राजनीतिक दल, विभिन्न पालिकाहरु, जनप्रतिनिधिहरु, सार्वजनिक, नीजि क्षेत्र, अस्पतालका सबै सहकर्मी र धेरैको विशेष सहयोग रह्यो ।

हाल म यही ल्याबमा नियमित रुपमा कोभिड परीक्षणमा जुटिरहेको छु । यसमा स सँगै मेरा सहकर्मी साथीहरुको कामप्रति लगाव, जिम्मेवारी झनै बढेको छ । हामी स्वाब परीक्षणमा खटिँदा बिहानीको सुर्यको किरणले हामीलाई कार्यस्थलमै भेट्थ्यो । त्यसैले कैयौं रात अनिदो भएर स्वाब परीक्षणमा खटियौं ।

परीक्षणको रिपोर्ट के आयो भनेर दिनमा धेरै फोनहरु आउँछन् तर कार्यव्यस्तताले त्यसको रेस्पोन्स गर्न भ्याइदैंन त्यसकारण कतिजना रिसाउनु पनि भएको होला तर यो बाध्यता बुझिदिनुहुन म आग्रह गर्दछु । हामीले सबैतिर समन्वय गर्दे नतिजालाई जतिसक्दो छिटो दिने प्रयत्न गरिरहेका छौं ।

कोभिड–१९ को सुरुवाती चरणदेखिको उच्च सर्तकता अपनाएकै कारण हालसम्म म फ्रन्टलाइनमा खटिदाँ समेत संक्रमित भएको छैन । यो मेरो लागि खुसीको कुरा हो । तर व्यक्तिगत रुपमा म मात्रै स्वस्थ्य भएर हँुदैन सबै नेपाली यो संक्रमणबाट मुक्त भई स्वस्थ्य हुनुपर्छ ।

(ल्याब टेक्नोलोजिष्ट भण्डारी हाल गुल्मी अस्पतालको कोभिड–१९ परीक्षण प्रयोगशालामा कार्यरत छन् ।)


क्याटेगोरी : समाचार



तपाईको प्रतिक्रिया दिनुहोस


ट्रेण्डिङ