राप्ती प्रतिष्ठानकी उपकुलपति भन्छिन्, ‘सामूहिक भनिएको राजीनामा नक्कली हो’

हेल्थ आवाज शुक्रबार, २०७६ भदौ ६ गते, १०:४४ मा प्रकाशित

काठमाडौं—राप्ती स्वास्थ्य विज्ञान प्रतिष्ठानकी उपकुलपति प्रा.डा. संगीता भण्डारीले प्रतिष्ठानका चिकित्सकहरुले सामूहिक राजीनामा बुझाएको विषयलाई नक्कली भएको दाबी गरेकी छन् ।

बिहिवार प्रतिष्ठानका २५ चिकित्सकले सामूहिक राजीनामा दिएको पत्र सार्वजनिक भएको थियो । ‘धेरैजना चिकित्सक म सँगै हुनुहुन्छ, सबै सेवा सञ्चालन भइरहेको छ,’ उनले भनिन्, ‘अर्कै सन्दर्भको बैठकमा लिइएको हस्ताक्षर प्रयोग भएको भन्दै धेरै चिकित्सकहरु आएर मलाई गुनासो गरिरहनुभएको छ ।’

उनले प्रतिष्ठानको अस्पतालमा उपलब्ध भएको ल्याब परीक्षण कमिसन लिएर बाहिर पठाएका कारण एक चिकित्सकको करार रद्ध गरिदिएको बताइन् । ‘अनैतिक काम गर्नेको करार रद्ध गरेपछि केहीले राजनीति गर्न खोजेका हुन्,’ उनको भनाइ छ, ‘फेक हस्ताक्षर बनाएर सामुहिक राजीनामाको हल्ला चलाइएको रहेछ ।’