काठमाडौं—सरकारले बैशाख महिनाभर संक्रमणको जोखिम बढेका जिल्लाका विद्यालय बन्द गर्ने निर्णय गरेको छ । सोमबार विहान प्रधानमन्त्री निवास बालुवाटारमा बसेको मन्त्रिपरिषद्को बैठकले कोभिड—१९ संक्रमणको जोखिम उच्च रहेको भन्दै बैशाख महिनाभर कोरोनाको उच्च जोखिम रहेका जिल्लाका विद्यालय बन्द गर्ने निर्णय गरेको हो ।
सरकारले जिल्लास्थित डिसीसीएमसीको सिफारिस बमोजिम विद्यालय बन्द हुनेछन् । भर्चुअल माध्यमबाट कक्षा सञ्चालन गरिनेछ ।
यस्तै, सरकारले पार्टी प्यालेस, सिनेमा हल, जिमखाना र रात्रीकालीन व्यवसाय पनि बैशाख मसान्तसम्मका लागि बन्द गर्ने निर्णय गरेको छ । सरकारले २५ जनाभन्दा बढी भेला हुन रोक लगाउने निर्णय समेत गरेको छ ।
स्वास्थ्य तथा जनसंख्या मन्त्रालयले २ बैशाखमा काठमाडौंसहित १४ जिल्लालाई अति प्रभावित जिल्लामा राखेको छ । जसमा ललितपुर, भक्तपुर, कास्की, रुपन्देही, चिवतन, बाँके, पर्सा, कैलाली, मोरङ, दाङ, सुर्खेत, बारा र बाग्लुङ रहेका छन् ।
जसमध्ये बाँके, रुपन्देही, कास्की, पर्सा, काठमाडौं, ललितपुरमा सक्रिय कोरोना संक्रमितको संख्या २ सय बढी छ । स्वास्थ्य मन्त्रालयले २ सय बढी सक्रिय संक्रमित रहेका जिल्लालाई रेड जोनमा राखेको छ ।
कोभिड—१९ नियन्त्रणका लागि सरकारले विस्तृत आदेश जारी गर्न लागेको छ ।
