काठमाडौं– वरिष्ठ आँखा रोग विशेषज्ञ प्रा.डा. पुज्यश्री कार्कीको कोभिड–१९ को संक्रमणबाट निधन भएको छ । बुधबार विहान नर्भिक इन्टरनेशनल अस्पतालमा उनको उपचारका क्रममा निधन भएको हो ।
‘कोभिड १९ संक्रमण कारण उहाँको आज विहान निधन भएको हो,’ नर्भिकका वरिष्ठ कर्पोरेट कम्युनिकेसन एण्ड पिआर म्यानेजर सोमनाथ बाँस्तोलाले भने । १० दिनदेखि डा. कार्कीको नर्भिकको आईसीयुमा उपचार भइरहेको थियो । .
किष्ट मेडिकल कलेज शिक्षण अस्पतालकी आँखा विभागकी विभागीय प्रमुखमा रुपमा उनी कार्यरत थिइन् ।
डा. कार्की १० वर्षदेखि आँखा रोगको चिकित्सकका रुपमा सक्रिय थिइन् ।
नेपाल मेडिकल कलेजबाट एमबीबीएस गरेकी कार्कीले विपी कोइराला स्वास्थ्य विज्ञान प्रतिष्ठान धरानबाट एमडी गरेकी थिइन् ।
नेपाल चिकित्सक संघले पनि कार्कीको निधनप्रति शोक व्यक्त गरेको छ । संघका महासचिव डा. बद्री रिजालले जारी गरेको शोक वक्तव्यमा डा. कार्कीले नेपालको चिकित्सा क्षेत्रमा पुर्याएको योगदानको सम्झना गरिएको छ ।
‘इमान्दार, लगनशील र निष्ठावान प्रतिष्ठित नेत्ररोग विशेषज्ञ चिकित्सकलाई गुमाउन पुगेकोमा नेपाल चिकित्सक संघ परिवार अत्यन्तै मर्माहित भएको छ,’ डा. रिजालले वक्तव्यमा भनेका छन् ।
