काठमाडौं—क्वेष्ट फर्मास्युटिकल्सले सन् २०२५ मा झण्डै तीन अर्ब रुपैयाँको कारोबार गरेको छ । क्वेस्ट फर्मास्युटिकल्सको फाइनान्सियल तथ्यांकअनुसार उसले सन् २०२५ मा २ अर्ब ९० करोड रुपैयाँको कारोबार गरेको हो ।
यसअघि सन् २०२४ मा क्वेस्टको कारोबार २ अर्ब ८५ करोड १० लाख रहेको थियो । कार्डियोभास्कुलर, डाइबटिज, डर्माटोलोजीको औषधि उत्पादन गर्ने क्वेष्टको कारोबार पछिल्ला वर्षहरुमा निरन्तर उकालोमा देखिन्छ । सन् २०२३ मा २ अर्ब ५४ करोड ३० लाख रुपैयाँको कारोबार गरको क्वेष्टले सन् २०२२ मा २ अर्ब ३२ करोड ३० लाख रुपैयाँ, सन् २०२१ मा १ अर्ब ९५ करोड रुपैयाँ, सन् २०२० मा १ अर्ब ८० करोड रुपैयाँ कारोबार गरेको थियो ।
सन् १९९९ मा स्वदेशी फर्मास्युटिकल्स कम्पनीका रुपमा क्वेष्टको स्थापना भएको थियो । उसले पहिलो मलीक्युलका रुपमा सन् २००१ मा एमलड एम्लोडिपिन उत्पादन सुरु गरेको थियो । विशेषगरी डायबिटिज र मुटु सम्बन्धी रोगका औषधि उत्पादनमा कम्पनीको विशेष ध्यान केन्द्रित रहेको छ । क्वेष्ट नेपालका प्रमुख स्वदेशी औषधि उत्पादकमध्ये एकका रुपमा स्थापित छ ।
सन् २०२६ को जनवरी मध्यसम्म आइपुग्दा क्वेस्टको सेयर स्वामित्व १५ जना व्यक्तिमा विभाजित छ । कम्पनीका चार निर्देशकहरु उमेशलाल श्रेष्ठ, पृथ्वीराज भण्डारी, उत्तमकुमार श्रेष्ठ र शैलेन्द्र प्रसाद वर्माले संयुक्त रूपमा करिब ४५ प्रतिशत सेयर स्वामित्व राखेका छन् । बाँकी सेयर भने निर्देशकहरूका परिवारका सदस्य तथा व्यावसायिक सहकर्मीहरूसँग रहेको छ ।
कम्पनीमा अहिले ५ सयभन्दा बढी कर्मचारी रहेको उसको वेवसाइटमा उल्लेख छ ।
