२०८१ असार ३०, आईतबार
Health Aawaj logo
गृहपृष्ठसमाचारएक डोज खोप लगाउनेमा नेपाल दक्षिण पूर्वी एसियामा पाँचौ स्थानमा

एक डोज खोप लगाउनेमा नेपाल दक्षिण पूर्वी एसियामा पाँचौ स्थानमा


काठमाडौं—कोभिड—१९ विरुद्धको पहिलो डोज खोप लगाउने दक्षिण पूर्वी एसियाका देशहरुमा नेपाल पाँचौ स्थानमा रहेको छ । विश्व स्वास्थ्य संगठन (डब्लूएचओ)ले प्रकाशित गरेको तथ्यांकअनुसार दक्षिण पूर्वी एसियाली १० देशमध्ये नेपाल पाँचौ स्थानमा रहेको हो ।

त्यसैगरी कोभिड—१९ विरुद्धमा दुवै डोज खोप लगाउनेमा नेपाल सातौ नम्बरमा छ । नेपालमा हालसम्म प्रति १०० जनामा एक डोज लगाउने ८ दशमलव २ जना र दुवै डोज लगाउने २ दशमलव ३ जना रहेका छन् ।

हालसम्म एक डोज सबैभन्दा बढी लगाउने भुटान पहिलो नम्बरमा छ । उसले ६४ प्रतिशतलाई पहिलो डोज खोप लगाइसकेको छ । भुटानमा दोस्रो डोज कतिले लगाए भन्ने कुरा तथ्यांकमा उल्लेख छैन ।

त्यस्तै, दोस्रो नम्बरमा माल्दिभ्स ५७.५ प्रतिशतलाई पहिलो डोज खोप लगाइसकेको छ । उसले ३२.८ प्रतिशतलाई दोस्रो डोज पनि खोप दिइसकेको छ ।

तेस्रो नम्बरमा रहेको भारतले १५ प्रतिशत जनसंख्यालाई पहिलो डोज लगाएको छ । भारतले दोस्रो डोज खोप ३.५ प्रतिशतलाई लगाएको छ ।

भारतपछि बढी पहिलो डोज खोप लगाउनेमा श्रीलंका छ । उसले जनसंख्याको १०.५ प्रतिशतलाई पहिलो डोज खोप दिइसकेको छ । छैटौ स्थानमा टिमोर लिस्टे, सातौ नम्बरमा इन्डोनेसिया र आठौं नम्बरमा थाइल्याण्ड, नवौं नम्बरमा बंगलादेश र दशौं नम्बरमा म्यानमार रहेका छन् ।

२१ जुनमा संकलन गरिएको तथ्यांकअनुसार बंगलादेशमा ५८ लाख २२ हजार १ सय ७७ जनाले पहिलो डोज खोप लगाएका छन् । त्यसैगरी भुटानमा ४ लाख ८४ हजार १ सय ९८ जना, भारतमा २१ करोड २४ लाख ७७ हजार ८० जना, इन्डोनेसियामा २ करोड ९ लाख ४ हजार ७ सय २३ जना, माल्दिभ्समा ३ लाख १४ हजार १ सय ७४ जना, म्यानमारमा १७ लाख ७२ हजार १ सय ७७ जना, नेपालमा २४ लाख ५१ हजार ९ सय २५ जना, श्रीलंकमा २३ लाख १७ हजार १२ जना, थाइल्याण्डमा ४५ लाख ३१ हजार ९ सय १४ जना र टिमोर लिस्टेमा १ लाख ३ हजार ८ सय १३ जनाले पहिलो डोज खोप लगाएका छन् ।

त्यसैगरी, बंगलादेशमा ४२ लाख ५७ हजार ४ सय ९९ जना, भुटानमा उपलब्ध छैन, भारतमा ४ करोड ९२ लाख ६३ हजार १ सय ९३ जना, इन्डोनेसियामा १ करोड १६ लाख ९९ हजार २१ जना, माल्दिभ्समा १ लाख ७९ हजार ४ सय ३६ जना, म्यानमारमा १२ लाख २२ हजार ७ सय २३ जना, नेपालमा ६ लाख ९१ हजार ४ सय ९४ जना, श्रीलंकामा ६ लाख १३ हजार २ सय जना, थाइल्याण्डमा १६ लाख ५६ हजार २ सय १० जना र टिमोर लिस्टेमा ६ हजार ७ सय १८ जनाले दोस्रो डोज खोप लगाइसकेका छन् ।

हालसम्म कोभिड—१९ विरुद्धको खोप लगाएको अवस्था हेर्दा दक्षिणपूर्वी एसियाली देशहरुमा तुलना गर्दा नेपालमा अवस्था नराम्रो नभएको स्वास्थ्य तथा जनसंख्या मन्त्रालयका प्रवक्ता डा. कृष्ण पौडेल बताउँछन् । पहिलो डोज कोभिशिल्ड लगाएर दोस्रो डोजको पर्खाइमा बसिरहेकाहरुलाई खोप चाडो उपलब्धता गराउनु मन्त्रालयका लागि चुनौती रहेको उनको भनाइ छ । ‘सेरोरिजनको तथ्यांक हेर्दा हामी खोप लगाउने देशहरुमध्येमा खराब अवस्थामा छैनौं,’ उनले भने, ‘तर, पहिलो डोज कोभिशिल्ड दिइसकेका नागरिकलाई दोस्रो डोज चाडोभन्दा चाडो लगाउन हामीलाई चुनौती छ ।’

हालसम्म खोप नै कोभिड—१९ बाट सुरक्षा गर्ने प्रमुख माध्यम भएतापनि सबैले खोप नपाउन्जेलसम्म स्वास्थ्य सुरक्षा मापदण्ड अनिवार्य अपनाउनुपर्ने उनको सुझाव छ ।


क्याटेगोरी : समाचार



तपाईको प्रतिक्रिया दिनुहोस


ट्रेण्डिङ