२०८१ साउन ५, शनिबार
Health Aawaj logo
गृहपृष्ठसमाचारकोभिड–१९ तेस्रो लहरसँग जुध्न नर्भिकको पूर्वतयारी, बालबालिकामा यी लक्षण देखिए अस्पताल लैजान सुझाव

कोभिड–१९ तेस्रो लहरसँग जुध्न नर्भिकको पूर्वतयारी, बालबालिकामा यी लक्षण देखिए अस्पताल लैजान सुझाव


काठमाडौं—थापाथलीस्थित नर्भिक अस्पतालले कोभिड–१९ को तेस्रो लहर आउनसक्ने सम्भावनालाई मध्यनजर गरी त्यसबाट प्रभावित हुनसक्ने सम्भावना रहेको भनिएका बालबालिकाहरुका लागि आवश्यक शैय्या तथा अन्य उपचार व्यवस्थाको पूर्व तयारी गरेको छ ।

स्वास्थ्य मन्त्रालयले २१ जेठमा सबै अस्पतालहरुलाई दिएको निर्देशन अनुरुप नर्भिक इन्टरनेशनल हस्पिटलले कोभिड–१९ को तेस्रो र चौथो लहर आउनसक्ने र त्यसबेला बालबालिका बढी मात्रामा संक्रमित हुनसक्ने अवस्थाको मध्यनजर गरी आफ्नो स्वीकृत शैय्याको २० प्रतिशत बढी शैय्या कोभिड–१९ संक्रमित बालबालिकाको उपचारमा प्रयोग हुने गरी तयारी अवस्थामा राखेको हो ।

नर्भिकले कोभिड–१९ को अब आउनसक्ने लहरको जोखिमबाट बालबालिकालाई बचाउन शैय्याको व्यवस्थापनसँगै त्यस्तो अवस्थामा स्तरीय सेवा दिने डेडिकेटेड टिम समेत तयार गरेको छ । टिममा विशेषज्ञ चिकित्सक र स्वास्थ्यकर्मीहरु रहेका छन् ।

नर्भिक अस्पतालले कोभिड–१९ को सम्भावित अर्को लहरसँग जुध्ने कार्यमा राज्यले सहयोग गर्ने उद्देश्यले आवश्यक वैकल्पिक प्राणवायू (अक्सिजन) तथा अन्य सबै कामको पूर्वतयारी समेत सुरु गरिसकेको छ । दोस्रो लहरमा समेत आफूलाई कोभिड अस्पतालमा रुपान्तरण गर्दै संक्रमितहरुलाई स्तरीय सेवा दिएको थियो ।

हाल कोभिड बिरामीको संख्या न्यून भएपनि कोभिडका लागि छुट्याइएको बेडहरुलाई अर्को लहरसँग जुध्न तयारी अवस्थामा राखिएको हो ।

बालबालिकामा यस्ता लक्षण देखिए अस्पताल लैजान सुझाव

नर्भिकले अभिभावकहरुलाई आफ्ना बालबालिकामा कोरोना संक्रमितको सम्पर्कमा गएपछि देखिने मल्टी सिस्टम इन्फ्लेमेटरी सिन्ड्रोमका लक्षणहरु देखा परेमा तुरुन्त अस्पताल पुर्याउन समेत आह्वान गरेको छ ।

यो भनेको कोभिड–१९ संक्रमित बालबालिकाको मुटु, फोक्सो, मिर्गौला, छाला, आँखाजस्ता अंग सुन्निने समस्या हो । यो सामान्यतयाः बालबालिकामा पनि कोभिड–१९ संक्रमित भएको २ देखि ४ हप्तापछि देखापर्छ ।

यसका लक्षणहरुमा आँखा रातो हुनु, सास फेर्न गाह्रो हुनु, घाँटी दुख्नु, पेट दुख्नु, ज्वरो आउनु, पखाला लाग्नु, छाला, ओठ वा नङ निलो हुनु, शरीरमा डाबर आउनु, थकान महसुस हुनु लगायतका रहेका छन् ।

कोभिड–१९ संक्रमित वा संक्रमितसँग सम्पर्कमा आएका बालबालिकाहरुलाई तीन दिनसम्म ज्वरो आएमा र माथि उल्लेख गरिएकामध्ये कम्तीमा कुनै दुई लक्षण देखा परेमा तुरुन्त अस्पताल लैजानुपर्ने विशेषज्ञ चिकित्सकहरुको सुझाव छ ।


क्याटेगोरी : समाचार



तपाईको प्रतिक्रिया दिनुहोस


ट्रेण्डिङ