काठमाडौं—शुक्रराज ट्रपिकल तथा सरुवा रोग अस्पताल टेकुको निर्देशकमा डा. अनुप बाँस्तोला नियुक्त भएका छन् । सोमबार स्वास्थ्य तथा जनसंख्या मन्त्रालयको मन्त्रीस्तरीय निर्णयबाट डा. बाँस्तोला अस्पतालको निर्देशकमा नियुक्त भएका हुन् ।
‘मैले अस्पतालको निर्देशक नियुक्त भएको पत्र पाइसके । अब अस्पताललाई सबैको अस्पताल बन्ने गरी सेवा प्रवाह गर्नका लागि प्रतिवद्ध रहनेछु,’ डा. बाँस्तोलाले हेल्थआवाजसँग भने, ‘महामारीको बेला मात्र यो अस्पतालाई सम्झिइन्छ । अब सधै अस्पताललाई सम्झने बनाउँछु ।’
डा. बाँस्तोला यसअघि अस्पतालको प्रवक्ताको जिम्मेवारीमा थिए । निर्देशक डा. सागरराज भण्डारीले अवकास पाएसँगै बाँस्तोला निर्देशक बनेका हुन् ।
पोखरामा जन्मिएका बाँस्तोलाले वि.सं. २०५३ सालमा लक्ष्मी आदर्श माध्यमिक विद्यालयबाट एसएलसी उत्तीर्ण गरेका हुन् । काठमाडौं युनिभर्सिटीबाट आइएस्सी अध्ययन पुरा गरेका उनले नेपालगञ्ज मेडिकल कलेजबाट एमबीबीएस गरेका हुन् ।
उनले न्याम्सबाट डर्माटोलोजीमा एमडी गरेका छन् । यस्तै, थाइल्याण्डको महिडोल युनिभर्सिटी स्कुल अफ ट्रोपिकल मेडिसिनबाट ट्रोपिकल एन्ड इन्फिक्सियस डिजिजमा एमडी गरेका छन् ।
वि.सं. २०६३ सालमा लोकसेवा आयोगमा नाम निकालेर सरकारी सेवामा प्रवेश गरेका बाँस्तोला ११ औं तहका चिकित्सक हुन् । उनले २ वर्ष दार्चुला जिल्ला अस्पतालमा काम गरेका थिए । १३ वर्षयता भने निरन्तर टेकु अस्पतालमा सेवारत छन् ।
