काठमाडौं—नवनियुक्त अर्थमन्त्री जनार्दन शर्माले कोभिड—१९ विरुद्धको खोपका लागि थप ५ अर्ब रकम निकासा दिने निर्णय गरेका छन् । बुधबार विहान पदभार ग्रहणपछि पहिलो निर्णयका रुपमा शर्माले खोपका लागि थप ५ अर्ब निकासा दिने निर्णय गरेका हुन् ।
यस्तै, उनले स्वास्थ्यकर्मीको जोखिम भत्ता निकासा सम्बन्धि निर्णय पनि गरेका छन् । अहिले कोभिड—१९ विरुद्ध फ्रन्टलाइनमा खटिएका स्वास्थ्यकर्मीले जोखिम भत्ता पाएका छैनन् ।
मन्त्री शर्माले पदभार ग्रहणका क्रममा कोभिड—१९ को महामारीबाट अर्थतन्त्रलाई उठाउन आफूले भूमिका खेल्ने बताए ।
उनले आफू अनुहार, जात र झण्डा नहेरी काममा केन्द्रित हुने बताए । मन्त्री शर्माले सरकार कोभिड १९ महामारीबाट जनताको जीवन रक्षामा केन्द्रित हुने पनि बताए ।
मंगलबार नेपाली कांग्रेसका सभापति शेरबहादुर देउवाको नेतृत्वमा नयाँ सरकार गठन भएपछि बसेको पहिलो क्याबिनेट बैठकले चैत्रभित्र सबैलाई खोप दिइसक्ने र एक हप्ताभित्र जोखिम भत्ता दिने निर्णय गरेको थियो ।
