काठमाडौं–सुईको माध्यमबाट लागु औषध सेवन गर्ने अधिकांश महिला पुरुष उच्च शिक्षा हासिल गरिरहेका वा गरिसकेका रहेको पाइएको छ ।
राष्ट्रिय एचआईभी एड्स तथा यौन रोग नियन्त्रण केन्द्र टेकुले सार्वजनिक गरेको एक सर्वेक्षणमा लागु औषध सेवन गर्ने ४२ दशमलव २ प्रतिशत पुरुष र ६१ दशमलव ७ प्रतिशत महिला प्रवेशिका परिक्षा उत्तीर्ण गरेका रहेको देखाएको छ ।
प्रत्येक वर्ष यौन रोगको जोखिम क्षेत्रमा रहेकाको एकीकृत जैविक तथा व्यवहार सम्बन्धी गरिने सर्वेक्षणले सो तथ्यांक बाहिर ल्याएको हो । केन्द्रले सन् २०२० को सो अध्ययन सार्वजनिक गरेको हो । जसमा १ हजार ६ सय ९० पुरुष र १ सय ५० जना महिला लागु औषध प्रयोगकर्ताको सहभागिता रहेको थियो ।
सर्वेक्षणमा छनोट भएका जिल्ला प्रदेश १ मा मोरङ, प्रदेश २ मा सर्लाही, बागमतीमा काठमाडौं, गण्डकीमा कास्की, लुम्बिनीमा रुपन्देही, कर्णालीमा सुर्खेत र सुदूरपश्चिमबाट कैलाली जिल्ला छानिएको थियो ।
के छ नतिजामा ?
पुरुष
- लागु औषध प्रयोगकर्ताको औसत उमेरः २८
- २५ वर्ष माथिका ५९ प्रतिशत
- अविवाहित ५७ प्रतिशत
- प्लस टु पास गरेका ४२.२ प्रतिशत
- नियमित एचआईभी जाँच गराउने ४६ प्रतिशत
- नियमित यौन साथीसँग यौन सम्पर्क गर्दा ६४ प्रतिशतले कण्डम प्रयोग गर्ने गरेको
- कहिलेकाहीँको यौन साथीसँग ३० प्रतिशतले मात्र कण्डम प्रयोग गर्ने गरेको
- यौनकर्मीसँग सम्पर्क गर्ने ४६ प्रतिशतले कण्डम नलगाएर यौन सम्पर्क गरेको
- १९ प्रतिशतले सुई साटासाट गर्ने गरेको
- ९२ प्रतिशतले एउटै सुई धेरै पटक प्रयोग गरेको
महिला
- औसत उमेर : २५ वर्ष
- ५५ प्रतिशत विवाहित, ४६ प्रतिशत २५ वर्षमुनिका
- ६१ दशमलव ७ प्रतिशत एसईई पास गरेका
- महिला ४८ प्रतिशतले एचआईभी परीक्षण गराउने गरेको
- ५२ प्रतिशत महिलाले अन्तिम पटक यौन सम्पर्क गर्दा कण्डम प्रयोग नगरेको
- नियमित यौन सम्पर्क गर्ने साथीसँग ४६ प्रतिशतले कण्डम प्रयोग गर्ने गरेको
- ९ प्रतिशत सुई साटासाट गर्ने गरेको
