काठमाडौं—नेपाल मेडिकल काउन्सिलको प्रमाणपत्र किर्ते गरेको आरोपमा एक जना चिकित्सक पक्राउ परेका छन् । आइतबार विहान नेपाल प्रहरीको केन्द्रीय अनुसन्धान ब्यूरो (सिआईबी)ले काउन्सिलको प्रमाणपत्र किर्ते गरेको आरोपमा विजयश्याम रन्जितलाई महाराजगन्जबाट पक्राउ गरेको हो ।
ललितपुर महानगरपालिका—२ का ३६ वर्षीय विजयश्याम काउन्सिलले लिएको लाइसेन्स परीक्षामा सहभागी भएर अनुतीर्ण भएका थिए । परीक्षणमा अनुतीर्ण भएपछि उनले काउन्सिलले जारी गर्ने स्थायी दर्ता प्रमाणपत्र किर्ते गरेको पाइएको हो ।
उनले काउन्सिलको १०८५५ नम्बरको प्रमाणपत्रमा काउन्सिलको छाप लगाएर रजिष्ट्रारको दस्तखत समेत किर्ते गरेको पाइएको प्रहरीले जनाएको छ । जुन दर्ता नम्बर अर्कै चिकित्सकको हो ।
सिआईबीका प्रवक्ता श्यामकुमार महतोकाअनुसार विजयश्यामले केही समय धापासीस्थित ग्राण्डी अस्पतालमा काम गरेका थिए । ‘उनले केही समय ग्राण्डी अस्पतालमा काम गरेका थिए,’ उनले हेल्थआवाजसँग भने, ‘त्यही बेला उनीमाथि कागजाग किर्ते गरेको उजुरी परेको थियो । त्यहीमाथि अनुसन्धान गर्दै जाँदा पक्राउ गरिएको हो ।’
उनलाई लिखत सम्बन्धी कसुरमा कारवाहीका लागि काठमाडौं जिल्ला अदालतबाट म्याद थप गरिएको प्रहरीले जनाएको छ ।