खोप प्रमाणपत्र दिँदा शुल्क नलिन स्वास्थ्य मन्त्रालयको निर्देशन

काठमाडौं—स्वास्थ्य तथा जनसंख्या मन्त्रालयले कोभिड—१९ खोप लगाएको प्रमाणपत्र दिँदा कुनै पनि शुल्क नलिन निर्देशन दिएको छ । आइतबार स्वास्थ्य मन्त्रालयको समन्वय महाशाखाले कोभिड—१९ विरुद्ध खोप लगाएको प्रमाणपत्र दिने अधिकार पाएका अस्पताललाई परिपत्र गर्दै यस्तो निर्देशन दिएको हो ।

७ साउनमा मन्त्रालयले सचिवस्तरीय निर्णय गर्दै वैदेशिक रोजगारी तथा अन्य कामको शिलशिलामा अन्तर्राष्ट्रिय यात्रा गर्नुपर्ने नागरिकले कोभिड—१९ विरुद्ध खोपको प्रमाण लिँदा कुनै शुल्क नलिने निर्णय गरेको थियो । तर, केही अस्पतालहरुले खोप लगाएको प्रमाणपत्र दिँदा शुल्क लिनेको गरेको जनगुनासो आएपछि मन्त्रालयले निःशुल्क गर्न पत्राचार गरेको हो ।

शुक्रराज ट्रपिकल तथा सरुवा रोग अस्पताल टेकु, सिभिल अस्पताल मिनभवन, पाटन अस्पताल लगनखेल र सशस्त्र प्रहरी अस्पताल बलम्बुले कोभिड—१९ विरुद्ध खोप लगाएको प्रमाणपत्र दिदैं आएका छन् ।