काठमाडौं–स्वास्थ्य तथा जनसंख्या राज्यमन्त्री उमेश श्रेष्ठले राष्ट्रिय स्वास्थ्य शिक्षा तथा सूचना केन्द्रको निर्देशकमा सुनिल शर्मालाई जिम्मेवारी दिएका छन् । राष्ट्रिय ट्रमा सेन्टरको निमित्त निर्देशकमा डा. प्रमोद जोशीलाई जिम्मेवारी दिएको स्वास्थ्य सचिव डा. रोशन पोखरेलले जानकारी दिए ।
केन्द्रको निर्देशक रहेकी डा. राधिका थपलियालाई विभाग अन्तर्गत फाजिलमा राखिएको छ । ट्रमाका निर्देशक डा. सन्तोष पौडेललाई कान्ति बाल अस्पताल सरुवा गरी काजमा ट्रमा सेन्टर नै राखिएको छ ।
डा. शर्मा लामो समयदेखि सूचना केन्द्रको निर्देशक थिए । डा. शर्मा सबै राजनीतिक दलका नेतालाई रुझाएर पदमा रहन माहिर मानिन्छन् ।
तीन महिनाअघि मात्र उनको सरुवा गरी ३ वर्षदेखि फाजिलमा रहेकी डा. थपलियालाई केन्द्रमा लगिएको थियो ।
समायोजनमा कर्णाली प्रदेश परेकी डा. थपलिया प्रदेश सरकारले स्वास्थ्य शिक्षा समूहको संरचना नै खारेज गरिदिएपछि समायोजन खारेज गरी पाउ भनी सर्वोच्च अदालत गएकी थिइन । सर्वोच्चले उनको पक्षमा अन्तरिम आदेश दिएसँगै मन्त्रालयमा हाजिर हुँदै आएकी थिइन् ।
ट्रमा सेन्टरमा पनि १० औं तहका चिकत्सकलाई हटाएर १० औं तहकै चिकित्सकलाई पुनः निमित्त निर्देशक दिइएको छ । केही समयअघि ट्रमाका तहका चिकित्सकले १० औं तहका चकित्सक निर्देशक हुँदा आफूहरु निरुत्साहित भएको भन्दै प्रधानमन्त्रीलाई पत्र पठाएका थिए ।
