काठमाडौं—हेल्थआवाज डटकममा फोटो सम्पादक नवराज वाग्ले हरि गोपाल फोटो पत्रकारिता पुरस्कारबाट सम्मानित भएका छन् । बुधबार राष्ट्रिय फोटो पत्रकार समूह (एनएफपीजे)को २५ औ वार्षिकोत्सव तथा रजत जयन्तीका अवसरमा वाग्लेलाई हरि गोपाल फोटो पत्रकारिता पुरस्कार २०७६/०७७ बाट सम्मानित गरिएको हो ।
वाग्ले मनोरन्जन विद्यातर्फबाट पुरस्कृत भएका हुन् । उनीसँगै कपिल खड्काले पनि मनोरन्जनतर्फबाट उक्त पुरस्कार पाएका छन् । वाग्ले पछिल्ला २८ वर्षदेखि मिडियामा सक्रिय रहेर काम गर्दै आएका छन् । उनले यसअघि लामो समय कान्तिपुर पब्लिकेसन्समा काम गरेका थिए ।
खेलकूद विद्यामा भने सत्यम श्रेष्ठ र उज्जवल डंगोलले पुरस्कार पाए । यस्तै, पर्यटनतर्फ नारायण सिलवाल र प्रेम थापालाई पुरस्कार प्रदान गरिएको थियो । संस्कृतितर्फ प्रदीप शाक्य र शोभा महर्जन पुस्कृत भए भने साहसिकतर्फ मुकुन्द कालिकोटे र पूर्णिमा श्रेष्ठले पुरस्कार पाए ।
पुरस्कृतलाई कार्यक्रमका प्रमुख अतिथी काठमाडौं महानगरपालीकाका मेयर विद्यासुन्दर शाक्यले प्रमाणपत्र, तामाको तक्मा र नगद पुरस्कार प्रदान गरेका थिए ।
