काठमाडौं-त्रिवि शिक्षण अस्पताल महाराजगन्जमा छैटौं कलेजो प्रत्यारोपण सफलतापूर्वक सम्पन्न भएको छ । अस्पतालका कलेजो प्रत्यारोपण सर्जन प्रा.डा. रमेशसिंह भण्डारी नेतृत्वको टोलीले शुक्रबार छैटौ कलेजो प्रत्यारोपण सफलता पूर्वक सम्पन्न गरेको हो ।
काठमाडौंका ३६ वर्षीय पुरुषलाई कलेजो प्रत्यारोपण गरिएको हो । उनलाई ३१ वर्षीया श्रीमतीले कलेजो दिएकी हुन् ।
डा. भण्डारीकाअनुसार शुक्रबार दिउँसो दुई बजेदेखि सुरु गरिएको प्रत्यारोपण राति ११ बजे सकिएको थियो । ‘अहिले बिरामी आईसीयुमा छन्, स्वास्थ्य अवस्था सामान्य छ,’ उनले भने ।
त्रिवि शिक्षणको डाक्टर भण्डारीसहितको टिमलाई भारतको फोर्टिस अस्पतालबाट आएको डा. विवेकसहितको टिमले सहयोग गरेको थियो ।
यसअघि डा. भण्डारीकै नेतृत्वमा त्रिवि शिक्षण अस्पतालमा पाँच वटा कलेजो प्रत्यारोपण सफलतापूर्वक सम्पन्न भइसकेको छ ।
