काठमाडौं—नेकपा एमाले निकट स्वास्थ्यकर्मीहरुको संगठन राष्ट्रिय स्वास्थ्यकर्मी संघ, नेपालको चौथो महाधिवेसन भोलिदेखि हुने भएको छ । पूर्व प्रधानमन्त्री तथा एमाले अध्यक्ष केपी शर्मा ओलीले शुक्रबार विहान ११ बजे प्रज्ञा भवनमा उद्घाटन गर्ने उक्त महाधिवेसन तीन दिन चल्नेछ ।
चौथो महाधिवेसनबारे जानकारी दिन बिहीबार राजधानीमा आयोजित पत्रकार सम्मेलनमा अध्यक्ष रामबहादुर चन्दले महाधिवेसनमा ७ सय बढी प्रतिनिधीहरु सहभागी हुने जानकारी दिए । उनले महाधिवेसनको सबै तयारी सकिएको जानकारी सम्मेलनमा दिए ।
महाधिवेसनले अध्यक्ष, महासचिवलगायत १७ पदाधिकारीसिहत १५१ सदस्सीय केन्द्रीय समिति चयन गर्नेछ । संघमा विभाजन आएकाले सहमतिमै नेतृत्व चयन गर्ने तयारीमा संघका नेताहरु छन् ।
यसअघि १३ फागुनमा बसेको संघको केन्द्रीय समिति बैठकले चौथो महाधिवेसनको मिति र स्थान टुंगो लगाएको थियो । एमाले विभाजन भएर माधवकुमार नेपाल नेतृत्वमा नेकपा एस बनेसँगै संघमा पनि विभाजन आएको छ ।
नेकपा एमाले निकट संघमा तेस्रो अधिवेशनबाट भक्तिमान सुब्बा अध्यक्ष चुनिएका थिए । तर, पार्टी विभाजनसँगै उनी नेकपा समाजवादीमा लागेपछि उपाध्यक्ष चन्दले कार्यबाहक अध्यक्षको जिम्मेवारी सम्हालिरहेका छन् ।
