वीरेन्द्रनगर—कालिकोटमा रहेको सरुवा रोग अस्पताल बजेट अभावमा बन्द हुने अवस्थामा पुगेको छ । दुई वर्षअघि कर्णाली प्रदेश सरकारले स्थापना गरेको सरुवा रोग अस्पताल बजेट अभाव भएपछि बन्द हुने अवस्थामा पुगेको हो ।
आगामी आर्थिक वर्षका लागि प्रदेश सरकारले बजेट नछुटाउँदा सरुवा रोग अस्पताल बन्द हुने अवस्थामा आएको छ । दुई वर्षदेखि विभिन्न किसिमका सेवा दिदै आइरहेको अस्पताललाई प्रदेश सरकारले आगामी आर्थिक वर्षका बजेट विनियोजन नगर्दा समस्या आएको जिल्ला स्वास्थ्य सेवा कार्यालय कालिकोटले जनाएको छ ।
एक जना मेडिकल अधिकृतसहित २१ जना स्वास्थ्यकर्मीहरुको दरबन्दी रहेको सरुवा रोग अस्पताल सञ्चालनका लागि आगामी आर्थिक वर्षमा आवश्यक पर्ने बजेट व्वस्थापनका लागि कर्णाली प्रदेश सरकार र सामाजिक विकास मन्त्रालय समक्ष अनुरोध गर्ने निर्णय भएको जिल्ला स्वास्थ्य सेवा कार्यालयका अधिकृत कटकबहादुर महतले बताए । ‘सर्वदलीय र सर्वपक्षीय वैठक बसेर सरुवा रोग अस्पताललाई तत्काल बजेट विनियोजन गर्न माग गर्ने निर्णय भएको छ,’ उनले भने, ‘आगामी वर्षमा बजेट व्यवस्था नहुँदा समस्या हुने भएको छ ।’
सामाजिक विकास मन्त्रालय र मुख्यमन्त्रीको कार्यालयलाई बजेट व्यवस्थापनका लागि माग गर्ने निर्णय भएको जिल्ला स्वास्थ्य सेवा व्यवस्थापक डा. संकेत विश्वकर्माले बताए । ‘२१ जना दरबन्दी रहेको अस्पतालमा २१ जनाले काम गर्दै आउनुभएको थियो,’ उनले भने, ‘अहिले त अस्पतालका लागि बजेट नै आएन् ।’
स्वास्थ्य क्षेत्रको पहुँच बढाउनुको साटो उल्टै घटाउनु दुःखद् विषय भएकोले यसका लागि आवश्यक पहल थालिने प्रमुख जिल्ला अधिकारी जोरासिंह माझीले बताए ।
