प्रधानमन्त्रीको स्वास्थ्यमा क्रमिक सुधार, राजनीतिक सल्लाहकारसँग भेटघाट

काठमाडौं—एपेन्डिसाइटिसको शल्यक्रिया गरेर त्रिवि शिक्षण अस्पतालको मनमोहन कार्डियो थेरासिस एण्ड भास्कुलर ट्रान्सप्लान्ट सेन्टरमा उपचाररत प्रधानमन्त्री केपी शर्मा ओलीको स्वास्थ्यमा क्रमिस सुधार हुँदैं गएको चिकित्सकहरुले बताएका छन् ।

स्वास्थ्यमा सुधार हुँदैं गएपछि प्रधानमन्त्रीले १ कचौरा दालको झोल खाएको चिकित्सकले बताए । ओलीको उपचारमा संलग्नमध्येका प्रा.डा. अरुण सायमीले प्रधानमन्त्रीको स्वास्थ्यमा क्रमिस सुधार भैरहेको पुष्टि गर्दै उनले एक कचौरा झोल खाएको पनि बताए ।

‘प्रधानमन्त्रीमा क्रमिक सुधार देखिएको छ, उहाँलाई ठीक छ,’ उनले भने, ‘उहाँले एक कचौरा दालको झोल पनि खानुभयो ।’ अस्पताल स्रोतकाअनुसार प्रधानमन्त्रीलाई हिजोसम्म मेडिकल टिमले मात्रै भेटेकोमा आज राजनीतिक सल्लाहकारहरुले समेत भेट गरेका छन् ।

चिकित्सकहरुकाअनुसार स्वास्थ्यमा क्रमिक सुधार देखिएपनि अझै प्रधानमन्त्रीको स्वास्थ्य खतरामुक्त भने भैसकेको छैन ।